Бұл туралы ресми Ақорда мәлімдеді, деп хабарлайды AtyrauPress тілшісі.
"Ғылым саласындағы елеулі жетістіктері үшін Ғылым және жоғары білім министрлігі «С. Өтебаев атындағы Атырау мұнай және газ университеті» КеАҚ қауымдастырылған профессоры –Яшков Владимир Александрович "Парасат" орденімен наградталсын" делінген хабарламада.
Одан бөлек, осы орденмен Ауыл шаруашылығы министрлігі «Қазақ егіншілік және өсімдік шаруашылығы ғылыми-зерттеу институты» ЖШС зертханасының меңгерушісі Есімбекова Минура Ахметқызы, Цифрлық даму, инновациялар және аэроғарыш өнеркәсібі министрлігі «Ионосфера институты» ЖШС бас ғылыми қызметкері Жантаев Жұмабек Шабденамұлы, Ғылым және жоғары білім министрлігі «Қорқыт Ата атындағы Қызылорда университеті» КеАҚ профессоры Серікбай Қошқаров мараптталды.
Айта кетейік, Президент Ғылым күні қарсаңында ғалымдармен кездесіп, кәсіби мерекесімен құттықтады. Қасым-Жомарт Тоқаев ғылымның әр саласында табысты еңбек етіп, мемлекетімізді өркендетуге атсалысып жүрген азаматтарға ризашылығын білдірді.
– Ғылым жолы – күрделі жол. Өз ісіне адал, табанды, еңбекқор, жаңашыл әрі жасампаз адамдар ғана ғылым жолындағы қиындыққа төзе алады. Біз шын мәнінде озық ойлы ұлт боламыз десек, қоғамда осы қасиеттерді дәріптеп, орнықтыруымыз қажет. Ұлы Абай да өз заманында «Ғылым таппай мақтанба» деп өсиет қалдырды. Қазір технология қарқынды дамыған кезеңде біз үздіксіз ізденіске, терең білім мен ғылымға ерекше мән беруіміз керек. Мен Бурабайда өткен Ұлттық құрылтай кезінде арнайы осы мәселеге тоқталдым. Бұл ретте ғылыми қауымдастыққа айрықша жауапкершілік жүктеледі. Өйткені, ғалым – ұлттың шамшырағы, – деді Мемлекет басшысы.
Амандық АБДОЛ
Фото: С. Өтебаев атындағы Атырау мұнай және газ университеті, "Ақорда"
