Атыраулық балуандар ел біріншілігінде үздік нәтиже көрсетті

ATPress.kz. 2 мамыр. Жуырда Шымкент қаласында грек-рим, еркін және әйелдер күресінен Қазақстан чемпионатының байрағы желбіреген еді. Біріншілікке 14 облыс және Астана мен Алматы қалаларының үздік балуандары жиналды.

Аталған жарыста Александр Поливадов жаттықтыратын грек-рим күресінен Атырау облысының құрамасы 1 алтын, 1 күміс және 1 қола медаль жеңіп алды. Бұл Атырау күресі тарихындағы бұрын-соңды болмаған іргелі жетістік. 

Мәселен, 72 келі салмақта Қаһарман Қисметов қарсылас шақ келтірмей, чемпион атанды. Оның ел біріншілігіндегі қарсыластары өте мықты болатын. Ол ақтық бәсекеде былтырғы әлем чемпионатының күміс жүлдегері алматылық Демеу Жадыраевты тізе бүктірген. 

Айта кетейік, осыған дейін Қаһарман Қисметов Францияның Макон қаласында өткен жастар арасындағы әлем чемпионатында күміс медаль еншілеген-тұғын. 

Ал, 97 келіде Илья Насточенко күміс жүлдегер атанса, 82 келі салмақта болашағынан зор үміт күттірер атыраулық жас балуан Евгений Поливадов қола жүлдеге қол жеткізді.

«Ақпан айында өткен 23 жасқа дейін жастар арасындағы Қазақстан чемпионатында 1 алтын мен 1 күміс медаль жеңіп алған едік. Енді міне, арада төрт айдан кейін ересектер арасындағы нәтижеміз одан да жақсара түсті. Қаһарман мен Евгений алғашқы ірі жарыстарына қатысып, керемет нәтижеге қол жеткізіп отыр. Әсіресе, Қаһарман еліміздің бірінші номерлі спортшыларын жеңді», - дейді грек-рим күресінен облыстың аға бапкері Александр Поливадов.

Алдағы уақытта жеңімпаз спортшылар Индонезияда өтетін Азия ойындарына қатысады.

 

Айқара Ғұмар