«ҚазМұнайГаз-Бұрғылау» компаниясынан 9 миллион теңге қарыз өндірілді

ATPress.kz. 12 маусым. Атыраудағы «ҚазМұнайГаз-Бұрғылау» сервистік бұрғылау кәсіпорны» ЖШС-дан 9 миллион теңгеден астам берешек өндірілді. Ол жеке кәсіпкерге тиесілі жұмыс ақысын төлемей қойған.

Бұл туралы Атырау облыстық мамандандырылған ауданаралық экономикалық сотының баспасөз қызметі хабарлады. Айтуынша, сотқа жеке кәсіпкер А. Дүзелбаева жауапкер «ҚазМұнайГаз-Бұрғылау» мекемесінен 9 миллион 302 мың теңге берешек сомасын және 93 мың теңге өсімпұлды өндіру туралы талап-арызымен жүгініпті.

Арыз-шағымда көрсетілгендей, сервистік компания екіжақты техникалық қызмет көрсету келісім шартын жасағанымен, еш негізсіз жеке кәсіпкердің жұмыс ақысын төлемеген. 

Алайда сот отырысында екі тарап та дауды бітімгершілік жолмен реттеуге ықылас білдірген. Нәтижесінде, «ҚазМұнайГаз-Бұрғылау» сервистік бұрғылау кәсіпорны А. Дүзелбаеваның есеп-шотына 9 миллион 302 мың теңге аударуға міндеттенді. 

Бүгінде бітімгершілік келісім сотпен бекітіліп, іс бойынша өндіріс тоқтаған. Сот ұйғарымы заңды күшіне енді.

Айдос Қарабала

Фото comprom.mid.gov.kz сайтынан алынған