АТЫРАУДА «ПОЛИЦИЯНЫҢ СЕРВИСТІК МОДЕЛІ» ІСКЕ ҚОСЫЛДЫ
Атырау қаласында «Полицияның сервистік моделі» пилоттық жобасы іске қосылды.
Аталған
пилоттық жоба Мемлекет басшысы Қасым-Жомарт Тоқсаевтың «Халық үніне
құлақ асатын мемлекет» қағидатын іске асыру мақсатында іске қосылып
отыр.
Жобаның негізгі мақсаты – азаматтарға сапалы қызмет көрсету және
құқықтық тәртіп саласындағы мәселелерді бірлесіп анықтау және шешу үшін
мемлекеттік институттар мен қоғам арасындағы тұрақты серіктестікті
қалыптастыру.
Сонымен қатар, жобаның арқасында қоғамның мемлекеттік органдарға, соның
ішінде полицияға деген сенімділігі артады деп болжануда.
Жобаны іске асыру мақсатында облыс әкімінің орынбасары Қайрат Бекеновтың
басшылығымен құрылған арнайы ведомствоаралық топ жұмыс істеуде.
«Жұмыс тобының негізгі міндеті Атырау қаласының шығыс бөлігінде
криминогендік жағдайды зерделеу және құқық бұзушылықтарды жасауға
итермелейтін себептер мен негіздерді анықтау мен жою бойынша ұсыныстар
енгізу. Жұмыс тобы осы аумақта соңғы үш жылда тіркелген барлық құқық
бұзушылықтар бойынша жан-жақты талдау жүргізуде»,-деді Қ.Бекенов.
Сондай-ақ, оның айтуынша, еріктілердің және қоғамдық бірлестік
өкілдерінің көмегімен қоғамдық сұрау салу жұмыстары кең көлемде
жүргізілуде. Соның ішінде онлайн саулнамаға кез-келген адам қатыса
алады.
