С.Өтебаев атындағы Атырау мұнай және газ университеті «Bett show 2025» көрмесіне қатысады, деп хабарлайды AtyrauPress тілшісі.
Қаңтардың 22-24 аралығында Лондонда өтетін халықаралық «Bett show 2025» көрмесінде университет студенттері мен ғалымдары «VR виртуалды кен орны» технологиясын таныстырады. Бұл туралы Өңірлік коммуникациялар қызметі мәлім етті. Бұл жоба виртуалды шынайылық арқылы мұнай-газ кен орындарын зерттеп, тәжірибелік дағдыларды жетілдіруге мүмкіндік береді. Инновациялық бастама білім беру сапасын арттырып, саладағы жаңа технологияларды қолданудың мүмкіндіктерін паш етпек.
- Атырау мұнай және газ университеті әлемнің түкпір-түкпірінен жиналған 35 мыңнан астам оқушы мен маманның басын қосатын ең үлкен көрмеге қатысу мүмкіндігіне ие болды. Бұл жиында білім беру сапасын жақсартуға көмектесетін жаңа технологиялар мен инновациялық жобалар таныстырылады. Онда еліміздің алты жоғары оқу орны қатысады, - деді Атырау мұнай және газ университетінің ректоры Гүлзада Шакуликова.
Сәуле МАҒАУ