Нұржау ауылындағы спорт кешенінің құрылысы аяқталды, деп хабарлайды AtyrauPress тілшісі.
Құрманғазы ауданы Нұржау ауылындағы спорт кешені құрылысы аяқталып, жиһаздары мен құрал-жабдықтарын құру жұмыстары жүргізіліп жатыр. Аудан әкімдігінің баспасөз қызметінен білгеніміздей, қазіргі уақытта нысанды пайдалануға қабылдауға құжаттар рәсімделуде.
Аудандық құрылыс бөлімі басшысы Жасұлан Сүндетов мердігер мекеме басшысына нысанды жуық арада халық игілігіне пайдалануға беру үшін құжаттарын рәсімдеп беруді тапсырды. Спорт кешенінің құрылысын мердігер мекеме "Номад Құрылыс Компаниясы” ЖШС-і жүргізуде. Бір қабатты нысанның жалпы ауданы 10 мың шаршы метр. Мұнда спорттық зал, дәрігер кабинеті, үйірмелерге арналған және киім ауыстыру бөлмелері бар.
Алдағы уақытта спорт кешенінен волейбол, футбол, баскетбол, үстел теннисі, күрес тағы басқа спорт түрлеріне арналған секциялар ашылып, халық игілігі үшін жұмыс жасайтын болады.
Айта кетейік, Нұржау ауылдық округінде 2912 тұрғын бар.
Амандық САҒЫНТАЙҰЛЫ