Оған Атыраудағы этнобірлестік көшбасшылары қатысты. Қазақстан халқы Ассамблеясы ұйымдастырған шарада жиналғандар бір-бірімен үш мәрте құшақтасып, игі тілектерін арнады, деп хабарлайды AtyrauPress тілшісі.
Мерекелік көңіл-күйді қаладағы суық ауа райы да бұза алмады. Ән әуелеп, күй күмбірледі. Жастар мың бұрала биледі. Аналар кеңесі мен Ақасақалдар кеңесінің өкілдері шараның шырайын келтіріп, көрігін қыздырды.
Сондай-ақ, қонақтарға арнап ақ дастархан жайылды. Ал, Еркінқала ауылының ақсақалы Хамза Ғабдолла алақан жайып бата берді.
«Бізде, яғни, еліміздің батыс өлкесінде Наурыз мейрамы Көрісуден басталады. Бұл – бір-бірімізге тәтті тілектер айтып, ізгі амалдар жасайтын күн. Ендеше, биылғы Наурыз елімізге құт-береке әкелсін!» деді ол.
Амандық САҒЫНТАЙҰЛЫ
Фото: Әнуар ӘБІЛҒАЗИЕВ