Тәуелсіздік тойына тарту

ATPress. 27 мамыр. Кәсіпкер Бағытжан Достановтың айтуынша, мұны тек қана өз ауылына деген сүйіспеншіліктен жасаған. Тәуелсіздіктің 25 жылдығын тойлауда, ол тек мерекелік шаралар өткізумен ғана шектеліп қалмау керек деп есептейді.

26 мамыр күні Жылыой ауданының Шоқпартоғай елді мекенінің тұрғындары, соның ішінде жергілікті мектеп оқушылары, айтулы оқиғаны атап өтті. Ауылдастары, сол мектептің түлегі, жергілікті кәсіпкер туған ауылына спортзал салып берді. Спортзал түгелдей спорттық жабдықтармен, киім ауыстыратын және душ бөлмелерімен, жаттығу залымен жарақталған. Қаладағы дене шынықтыру-сауықтыру кешеніндей болмаса да, бұл спорт залда балалардың бірнеше спорт түрімен айналысуына мүмкіндік бар, және де ең бастысы, спорт нысаны жергілікті мектептің құзіретіне тапсырылды. Сондай-ақ жаңа оқу жылынан бастап денешынықтыру пәні осы жерде өткізілетін болады. 

Мектеп түлегі, қазіргі таңдағы кәсіпкер, жергілікті компаниялардың бірінің директоры Бағытжан Достанов, бұл нысанды өз қаражатына салған. ATPress тілшісіне берген сұхбатында, бұл бұрыннан оның ойында жүрген нәрсе екенін айтты. Құрылыстың басталуы мен аяқталуы, барлығын да, Тәуелсіздіктің 25 жылдығына орайластырылғанын атап өтті. Бұл туып өскен ауылына, туған жеріне деген сый. 

-  Тәуелсіздіктің 25 жылдығын тойлауда тек мерекелік шаралар өткізумен ғана шектеліп қалмау керек. Мен өз ауылыма спорттық зал сыйлаймын деп шештім. Бұндай сыйлықты ақшамның асып-тасып жатқандығынан емес, ауылыма деген сүйіспеншілігім мен жерлестеріме деген сыйластықтан жасадым, - деді Б. Достанов.

Ол, құрылысы аяқталып, мектеп балансына берілген спорт нысанының барлық техникалық жағдайы мен коммуналдық төлемдері, бір жыл бойына өз компаниясының қаражатынан төленетінін айтты. Бұдан бөлек, кәсіпкердің есебінен мектепке жұмыс жасауға, күрестен балалар бапкері шақырылатын болады. Жаңа спорт зал мектеп ғимаратынан тыс болғанымен, мектеп ауласында тұр.

Мектеп мұғалімдерінің айтуы бойынша, Шоқпартоғай елді мекенінде қазіргі таңда үш мыңнан астам адам тұрады. Олардың 563 – мектеп оқушылары. Соның ішінде 120 бала спортпен белсенді түрде шұғылданады, 80 ұл мен қыз күреспен айналысады. Сол себепті де жаңа спорт залы, спорттың осы түріне қарай ыңғайластырылғаны ғажап емес. Шоқпартоғай палуандары тек Атырау облысы емес, сонымен қатар республика аумағында да кеңінен танымал. Қазақша күрес пен дзюдодан бөлек, балалар баскетбол, волейбол сынды спорт түрлерімен және тоғызқұмалақ, шахмат сияқты интеллектуалдық ойындармен де белсенді айналысады.

ATPress