Облыстық балалар тіс емханасында күніне 300-дей адам қаралады, деп хабарлайды AtyrauPress тілшісі.
Атырау облыстық балалар тіс емханасында күніне 300-ге жуық, ал айына 9 мың бала ем алады. Емхана тегін қызмет көрсетеді. Өңірлік коммуникациялар қызметінің мәліметінше, хирургия бөлімінің өзінде әр күні отыз шақты бала қаралып, емделеді.
- Жалпы балаларды қабылдайтын 19 тіс дәрігері бармыз. Әрқайсысымыз күніне орта есеппен 15 баладан қабылдаймыз. Ата-аналар балаларының тісіне баса назар аударса екен дейміз. Мәселен бүлдіршінге арналған тіс пастасының құрамында фторид пен химиялық қоспалардың мөлшерін қадағалау керек, тіс щеткасының да эмальға зақым келтірмейтіндей жұмсақ қылшықты болғаны дұрыс,- деді балалар тіс дәрігері Альбина Қаламова.
Мамандардың айтуынша, тіс емдегенде алдын ала аллерготестілеуден өтуден қашпау керек. Өйткені ол алдыңғы кезекте науқастың өзі үшін маңызды. Айта кетейік, емханадағы стоматологиялық қызметтер жаңа туған нәрестеден бастап 18 жасқа дейінгі балаларға көрсетіледі.
Амандық САҒЫНТАЙҰЛЫ