Біздің редакцияға хабарласқан Құрманғазы ауданындағы «Капуанов» шаруа қожалығының иесі Бек Капуанов киіктерден қауіпті кенелер тарап, төрт түлік зардап шегіп жатқанын жеткізді, деп хабарлайды AtyrauPress тілшісі.
«Бұл жаздағы кене емес, киіктерден тарайтын және малға үлкен қауіп төндіретін жәндік. Біз онымен тек биыл ғана емес, қыс бойы күресіп шықтық. Аудандық әкімдікке де бірнеше рет айтылды. Ал, қазіргідей мал төлдейтін уақытта малды өңдеуге болмайды. Осыны пайдаланған кенелер төрт түліктің қанын сорып, жылқылар бастап өліп жатыр. Былай қарағанда, осы малдың етін бүкіл облыс халқы тұтынады ғой. Мәселен, Түркістанда малды жаппай кенеге қарсы өңдеп шығады екен. Сондықтан құзырлы органдар тарапынан қандайма бір қолдау көрсетілгенін қалаймыз» дейді ол.
Бұл мәселе күні кеше ғана Сенат қабырғасында да көтеріліпті. Нәтижесінде, енді өңірге облыстық мәслихат депутаттарының шақыртуымен Астанадан арнайы комиссия келетіні белгілі болды.
Амандық САҒЫНТАЙҰЛЫ