Х.Досмұхамедов атындағы Атырау университетінде Атырау облысының Құрметті азаматы, «Парасат» орденінің иегері, қоғам қайраткері Мәдина Ғабдісәлімқызының 90 жылдық мерейтойына арналған «Еңбекпен өрілген өмір» атты өңірлік конференция өтті, деп хабарлайды AtyrauPress тілшісі.
Мәдина Ғабдісәлімқызының ғылым, білім және қоғамдық саладағы елеулі еңбегін жан-жақты талқылап, оның жас ұрпаққа үлгі боларлық өмір жолы мен еңбекқорлығын насихаттау мақсатында ұйымдастырылған конференцияға Атырау облысының ардагерлері, кәсіподақтардың мүшелері, ЖОО-ның басшылығы, профессор-оқытушылары мен білім алушылар қатысты.
Конференция ашылуында Мәдина Ғабдісәлімқызының өмірі мен еңбегі туралы деректі фильм көрсетіліп, оның мемлекеттік және қоғамдық қызметтегі өнегелі өмірі баяндалды. «Атырау облысы көлемінде ұйымдастырылып жатқан Мәдина Ғабдісәлімқызының 90 жас мерейтойына арналған кезекті шара бүгін Атырау университетінде ұйымдастырылып жатыр. Бүкіл саналы ғұмырын еліміздің, Атырау өңірінің дамуына арнап, еңбекке ерте араласып, бүгінде мерейлі 90 жасқа шығып отырған апайымызды шын жүректен құттықтаймыз! Сіздің өнегелі өміріңіз бен еңбек жолыңыз көпшілікке, соның ішінде жастарға үлгі!»,- деді Саламат Идрисов алғы сөзінде.
Шараның алғашқы бөлімінде Атырау облыстық ардагерлер кеңесінің төрағасы Мұрат Өтешов, «AMANAT» партиясы Атырау облыстық филиалының төрағасы Абдолла Идресов, Атырау облысының Құрметті азаматы, ауыл шаруашылық ғылымдарының докторы, профессор Бақтыбек Таубаев, Х.Досмұхамедов атындағы Атырау университеті Ардагерлер кеңесінің төрағасы, п.ғ.к Шахман Нагимов, Атырау облысының Құрметті азаматы, университеттің алғашқы түлектерінің бірі, мемлекет және қоғам қайраткері Қатимолла Ризуанов, «Қазақстандық салалық білім және ғылым қызметкерлері кәсіптік одағының Атырау облыстық ұйымы» ҚБ төрағасы Қылышбай Сүндетұлы және аудандардан арнайы келген қонақтар құттықтау сөз сөйлеп, мерейтой иесінің өңір дамуына қосқан үлесін жоғары бағалап, мерейлі жасымен құттықтады.
Салтанатты шара барысында елімізге белгілі ғалым, ақын, профессор Қадыр Жүсіп Өтегенұлы Мәдина Ғабдісәлімқызына арнап шығарған жыр шумақтарын оқып, сиясы кеппеген жаңа кітабын тарту етті.
Конференцияның пленарлық мәжілісінде тарих ғылымдарының докторы, профессор Жамиға Таңатарова «Мәдина Ғабдісәлімқызының ғылыми ізденістері және қоғамдық қызметі», Саламат Мұқашев атындағы Атырау политехникалық жоғары колледжі директорының тәрбие ісі жөніндегі орынбасары Гүлбаршын Мусина «Ұрпаққа үлгі - өмір жолы», Атырау қаласының Құрметті азаматы, Атырау облысы әкімінің жанындағы әйелдер істері және отбасылық-демографиялық саясат жөніндегі комиссия мүшесі Тамара Аман-Турлина «Сәнді, әдемі қартаюдың феномені» тақырыптарында баяндама жасап, мерейтой иесінің өмір жолына тоқталып, оның жастар тәрбиесіндегі маңызын атап өтті.
«Елдік мүдде жолында дараландыратын басты нәрсе адамдық пен адал еңбек. Осы адал еңбектің арқасында Атырау өңірінің ардақтысы айналған тұлғалардың бірі - Мәдина Ғабдісәлімқызы. Өмірлік жиған-терген білімі мен біліктілігін елдің мүддесіне жұмсап келе жатқан, республикаға танымал, қоғам, мемлекет қайраткері, тағылымды ана, ізденімпаз ғалым, сүйікті жар. Ұлы Отан соғысының бар ауыртпашылығын көріп, есейген ұрпақтың өкілі. Мәдина апай - облыстағы қыздар қозғалысының көшбасшысы, рухани шамшырағы. Мәдина апайдың өмір жолы мен тәжірибесі, ғылыми жұмыстары зерттеліп, дипломдық және магистрлік диссертацияларға тақырып болса, апайдың кандидаттық диссертациясы жаңа кезеңге бейімделіп, жаңартылып кітап етіп шығарылса деп ұсыныс білдіремін», - деді тарих ғылымдарының докторы, профессор Жамиға Таңатарова.
Жиын музыкалық үзілістен кейін естелік суретке түсумен аяқталды. Бұл мерейтой – Атырау өңірінің дамуына өз үлесін қосқан ардақты тұлғаның еңбегін лайықты дәріптеу болды.
