Облыстық энергетика басқармасының тапсырысымен 2024 жылдың аяғында басталған, Нұрсая шағынауданындағы жерасты қысымды 8 шақырым (диаметрі 600 мм) екі құбырдан тұратын кәріз коллекторына жөндеу жұмыстары жүргізілді, деп хабарлайды AtyrauPress тілшісі.
Аталған коллектор арқылы Нұрсая шағын ауданының барлық кәріз сулары өтеді. Басқармадан білгеніміздей, ағымдағы жөндеудің негізгі жұмыстары – тозығы жетіп, істен шыққан 30 ескі ысырмаларды жаңа болат ысырмаларға ауыстыру. Бұл ысырмалар тоғыз тораптық темірбетонды камера бойына орнатылды. Сонымен қатар, коллектор құбырын қоқыс пен кәріз қалдықтарынан тазарту негізгі жұмыстардың бірі болып табылады.
Бұдан бөлек, диаметрі 100 мм ысырмалар демонтаждалып, қайта орнатылды. Екі тораптық камераға жаңа жабын плиталары (қақпақтар) мен сегіз темірбетонды құдық (диаметрі 1,5 м) орнатылды. Олар қажет болған жағдайда бір коллектордан екінші коллекторға ағынды суларды ауыстыру үшін пайдаланылады. Тоғыз тораптық темірбетонды камера толықтай тазартылды. Жұмыстар толық аяқталды. Қазіргі таңда, Нұрсая шағын ауданын қамтитын және кәріз суларын булану алаңына бұратын жер асты қысымды кәріз коллекторы қалыпты режимде жұмыс істеуде.
Амандық САҒЫНТАЙҰЛЫ