Еліміздің батыс өңірінде 1 сәуір мен 31 мамыр аралығында «Бекіре-2024» ауқымды балық қорғау акциясы өтеді. Бұл кезеңде табиғат қорғау және құқық қорғау органдары бағалы балық түрлерін, соның ішінде бекіре тұқымдастарды браконьерліктен қорғау және олардың уылдырық шашу кезіндегі еркіндігін қамтамасыз ету үшін күш біріктіреді. Бұл туралы ҚР АШМ Балық шаруашылығы комитетінің төрағасы Серік Сермағамбетов баспасөз мәслихатында баяндады, - деп хабарлайды Өңірлік коммуникациялар қызметі.
Спикердің сөзінше, балық қорғау іс-шараларының тиімділігін арттыру үшін ҚР Ауыл шаруашылығы, Ішкі істер министрлері мен Ұлттық қауіпсіздік комитеті төрағасының «Бекіре» балық қорғау акциясын өткізу туралы Бірлескен бұйрығына қол қойылды. Оның негізінде құрылған балық қорғау акциясын үйлестіру штабына ҚР Ауыл шаруашылығы министрлігінің Балық шаруашылығы комитеті басшылық етеді.
- «Бекіре-2025» – тек браконьерлікпен күрес шарасы емес, сонымен қатар су ресурстарын сақтауға бағытталған маңызды бастама. Бекіре тұқымдас балықтардың саны жылдан жылға азайып келеді, сондықтан біз олардың көбеюіне қолайлы жағдай жасауға міндеттіміз. Бұл үшін барлық күшімізді жұмсай отырып, табиғат қорғау шараларын қатаң түрде жүзеге асырамыз. Балық шаруашылығы комитеті акцияның үйлестірушісі ретінде барлық мемлекеттік органдардың тиімді жұмыс істеуін қамтамасыз ететін болады, - деді С.Сермағамбетов.
ҚР ҰҚК Шекара қызметі департаменті бастығының Атырау облысы бойынша бірінші орынбасары Айдос Кикабаев акция барысында браконьерлік жиі болатын аймақтарда стационарлық және жылжымалы бекеттер, мобильді топтар ұйымдастырылатынын атап өтті. Каспий теңізінің жағалауы мен акваториясында, сондай-ақ Жайық пен Қиғаш өзендерінің сағаларында бақылау күшейтіледі. Сонымен қатар әуежайлар, вокзалдар мен автожолдарда балық пен балық өнімдерін заңсыз тасымалдауға қарсы іс-шаралар жүргізіледі.
- Шекара қызметі заңсыз балық аулау мен оның тасымалына қарсы күрес шараларын күшейтуде. Біздің негізгі міндетіміз – мемлекеттік шекара маңында браконьерлік әрекеттердің алдын алу және оларды дер кезінде анықтау. Біз бақылау бекеттерінің жұмысын күшейтіп, Каспий теңізінің су айдындарында, сондай-ақ өзен-көлдерде патрульдеу жұмыстарын жалғастырамыз. Бұл шаралар балықтардың табиғи көбеюіне мүмкіндік береді, - деді ол.
Анықтама үшін: жыл басынан бері балық қорғау акциясына еліміздің батыс өңірінде табиғат қорғау және құқық қорғау органдарының 1500-ге жуық қызметкері жұмылдырылды. Оның ішінде 604-і Атырау облысында, 222-сі Батыс Қазақстан облысында, 640-ы Маңғыстау облысында болса, акция аясында 300 автокөлік, 84 қайық пен шағын көлемді кеме, 6 ұшу аппараты және басқа да техникалық құралдар тартылғанын да айта кетейік.