Атырау облыстық сотының қылмыстық істер жөніндегі сот алқасында Атырау қаласы әкімдігінің бұрынғы лауазымды тұлғаларына қатысты қылмыстық іс адвокаттардың апелляциялық шағымдары, Атырау облысы прокуроры орынбасарының апелляциялық өтінішхаты бойынша қаралды., деп хабарлайды AtyrauPress тілшісі.
Облыстық соттың баспасөз қызметінен білгеніміздей, бірінші саты сотының үкімі бойынша К.Е. және У.К. ҚК-тің 361-бабының 4-бөлігінің 3-тармағы бойынша кінәлі деп танылып, К.Е.-ға 5 жыл мерзімге бас бостандығын шектеу жазасы тағайындалды; У.К.-ға тағылған айыптың аз көлемі ескеріле отырып, 3 жыл мерзімге бас бостандығын шектеу түріндегі жаза тағайындалды.
К.Н. ҚК-тің 361-бабының 4-бөлігінің 3-тармағымен және ҚК-тің 369-бабының 1-бөлігімен кінәлі деп танылып, оған 6 жыл мерзімге бас бостандығын шектеу түріндегі жаза тағайындалды.
У.К., К.Е. және К.Н. өмір бойына мемлекеттік қызметте лауазымдарды атқару құқығынан айырылды.
И.Ж. ҚК-тің 361-бабының 4-бөлігінің 3-тармағы бойынша оның әрекеттерінде қылмыстық құқық бұзушылық құрамының болмауына байланысты ақталды.
У.К. ҚК-тің 369-бабының 3-бөлігі бойынша ақталды; К.Е. және И.Ж. ҚК-тің 369-бабының 1-бөлігі бойынша ақталды; К.Е., К.Н. және И.Ж. ҚК-тің 190-бабының 4-бөлігінің 2-тармағы бойынша олардың әрекеттерінде қылмыстық құқық бұзушылық құрамының болмауына байланысты ақталды.
У.К. қала әкімі бола тұра, жер қатынастары бөлімінің басшысы К.Н. және сәулет және қала құрылысы бөлімінің басшысы К.Е.-ге рекреациялық аймақтағы 8 жер учаскесін беру туралы тапсырма берген. Сотталушылар К.Н. және К.Е. өзара сөз байласып, рекреациялық және санитарлық аймақтардағы 18 жер учаскесін берген. Осылайша, К.Н. жер комиссиясының хаттамасының қосымшасына комиссия отырысында қаралған деп 18 өтініш туралы жалған мәліметтер енгізген.
Тағылған айып келесі бөлігінде расталмады:
1.И.Ж. қызметтік өкілеттіктерді асыра пайдаланды деген айыппен оның осы қылмысты жасауға қатысы бар екендігі туралы жеткілікті дәлелдер тергеумен ұсынылмаған. Оның қызметтік өкілеттігіне рекреациялық және санитарлық аймақтардағы жер учаскелерін беру мәселесі кірмеген.
2.У.К., К.Е. және И.Ж.-ға тағылған айыптауда қандай құжаттарға (жер учаскесін таңдау актілері, жер комиссиясының хаттамалары және т.б.) жалған мәліметтер немесе түзетулер енгізілгені нақтыланбаған.
3.Аталған сотталушылармен құжаттарға жалған мәліметтер енгізілу фактілері анықталмаған.
4.Қылмыстық қудалау органымен мүлікті жымқыру дәлелдері ұсынылмаған. Сотталушылардың бірдей әрекеттері өкілеттіктерді теріс пайдалану және алаяқтық ретінде әртүрлі баптар бойынша дәрежеленген.
Облыстық соттың апелляциялық алқасы бірінші саты сотының қорытындыларымен келісті. Сот үкімін өзгеруге немесе оның күшін жоюға негіздер анықталмады. Осыған байланысты, қылмыстық істер жөніндегі сот алқасының қаулысымен бірінші саты сотының үкімі өзгеріссіз қалдырылды.
Амандық АБДОЛ
Фото: ru.freepik.com