Атыраулықтар тұңғыш рет көкпар тартысты

ATPress.kz, 31 қазан. Ел Тәуелсіздігінің 25 жылдығына орайластырылып, Талғайраң елді-мекенінде ұйымдастырылған «Жаппай көкпар» додасының бас бәйгесін атыраулық Рахат Орындыбаев жеңіп алды.

Дүбірлі додада 4 салымға қол жеткізген палуан жылқы малы мен қоса 50 мың теңге көлемінде сыйақыны еншілеп, «Үздік салымшы» номинациясына ие болды.

Облыстық дене шынықтыру және спорт басқармасының қолдауымен ұлттық спорт түрлері қауымдастығының ұйымдастыруымен өткен додаға Атырау қаласы мен аудандардан 30 шабандоз қатысты. Атыраудағы тұңғыш көкпарды көруге Моңғолияның ұлттық спорт түрлері қауымдастығының президенті Ром Әуезхан, НКОК компаниясының қызметкері австриялық Вольфганг Пробег, мемлекеттік жаттықтырушы Рамазан Саттыбай арнайы келіпті.

- Спорт түрінің «Жаппай көкпар» аталуының ерекшелігі мұнда серкені белгілі жерге жеткізген бір адам ғана жеңімпаз атанады. Ұлттық спорт түрлері Атырау облыстық клубының директоры Өнербай Жанбаланың ықпалымен көктем айында «Жаппай көкпар» ойыны облыстық деңгейде тағы ұйымдастырылады. Көктемдегі додаға «Аударыспақ», «Теңге ілу», «Жамбы ату» ойындарын қосуды да жоспарлап отырмыз, - дейді спорт клубы директорының орынбасары Руслан Крымбаев.

Нұрбейбіт Нұғыманов
Сурет автордікі