Құрманғазы ауданында жаңа әкім тағайындалды

ATPress. 29 сәуір. Қазақстан Республикасы Президенті Әкімшілігінің және аудандық мәслихат депутаттарының келісімі бойынша облыс әкімі Нұрлан Ноғаевтың өкімімен Бибоз Шаяхметов Құрманғазы ауданының әкімі болып тағайындалды.

Атырау облысы әкімдгінің баспасөз қызметінің ақпараты бойынша, бүгін, сәуірдің 29-да, облыс әкімі Нұрлан Ноғаев Құрманғазы аудандық мәслихатының кезектен тыс сессиясына қатысып, Атырау облысы Құрманғазы ауданы әкімі лауазымына Бибоз Шаяхметовтың кандидатурасын ұсынды. Депутаттар облыс әкімінің ұсынысын бірауыздан қолдады.

Өңір басшысы сол күні аудан активіне жаңа әкімді таныстырды.

2013 жылдан бері ауданға басшылық еткен Амангелді Барақатов өз еркімен жұмыстан кету туралы арызы негізінде қызметінен босатылды.

Анықтама:

Бибоз Байдәулетұлы Шаяхметов 1960 жылы Атырау облысы, Қызылқоға ауданы, Миялы селосында дүниеге келген. Білімі жоғары. Батыс Қазақстан ауыл шаруашылығы институтын бітірген.

Еңбек жолын 1976 жылы Қызылқоға ауданы, Миялы селосындағы «Казсельхозтехника» бірлестігінде жөндеуші қызметінен бастаған. 

1983-1990 жылдары Қызылқоға ауданы, Миялы селосында аудандық қаржы, жоспарлау бөлімдерінде, «Миялы автотранстпорт» кәсіпорнында аға экономист, Қызылқоға ауданы, Миялы селосында аудандық комсомол комитетінде екінші, кейін бірінші хатшы болып істеген.

1990-1999 жылдары Қызылқоға ауданы, Миялы селосында Халықтық бақылау комитетінде инспектор, аудандық партия комитетінде нұсқаушы, аудандық қаржы бөлімінде ауыл шаруашылығы жөніндегі аға экономист, аудандық төлем орталығында бірінші санаттағы маман, аудандық экономика басқармасының бастығы, аудан әкімінің орынбасары болып қызмет атқарған.

1999-2016 жылдар аралығында Қызылқоға ауданы, Миялы селосында бірнеше аудандық бөлімдерде бөлім меңгерушісі, Қызылқоға ауданы әкімінің орынбасары болып істеген. 

«Астана қаласына 10 жыл», «Қазақстан Конституциясына 20 жыл» мерекелік медальдарымен, «Үздік мемлекеттік қызметші» төсбелгісімен марапатталған.

29 сәуірден бастап Атырау облысы Құрманғазы ауданы әкімі.

ATPress