Қазақстан жерлері шетелдіктерге сатылмайды

Шетел азаматтарына Қазақстандағы ауыл шаруашылығы мақсатында пайдаланатын жер телімдері сатылмайды. Нотариат ондай мәмілелер жасаспайды.

Бұл туралы ҚР Ұлттық экономика министрлігінің экономиканың инфрақұрылымын дамыту департаменті басшысының орынбасары Гүлжахан Бимендина Атыраудағы Өңірлік коммуникациялар қызметінің баспасөз-конференциясында мәлімдеді. Журналистермен болған кездесуде ол келісімдер тек Қазақстан Республикасының азаматтары арасында рәсімделетінін айтты. Шетелдіктердің бұл жерлерді сатып алуына құқығы жоқ. 

- Біз барлық нюанстарды ескердік. Нотариат туралы заңға өзгерістер енгізілді. Онда: нотариус келісім рәсімдемейді деген тәртіп бар. Ол жерде тыйым салынған. Нотариус арқылы рәсімделген құжаттамалар, автоматты түрде әділет органына түсіп отырады. Жер теліміне кім иелік ететіні, бүгінгі күні кім сатып алғаны және ол Қазақстан Республикасының азаматы екенін растайтын мемлекеттік жер кадастрлерінің ақпараттық тізімі бар, - деді Г. Бимендина.

Сонымен қатар ол, жер нысаналы мақсатта пайдаланылуы керек екенін атап өтті. Шетелдіктің ауыл шаруашылығы мақсатындағы жерді сатып алу жағдайы орын алмайтын болады. Жоғарыда атап өткендей, нотариат ондай мәмілелерді рәсімдемейді.

- Нотариат туралы Заңда бұған тыйым салныған. Біз барлығын да қарастырдық. Шетелдіктерге жер телімдері тек уақытша пайдалануға ғана берілетін болады. Онда да өз талаптары мен міндеттері бар, - деп мәлім етті Г. Бимендина.

ATPress

Суретті түсірген Рахим Қойлыбаев