М. Құл-Мұхаммед: «Заң-кәсібін де, нәсібін де жерден тауып отырған азаматтар арасында талқылануы керек»

ATPress. 19 мамыр. Орталық коммуникациялар қызметніде өткен брифингке қатысқан «Нұр Отан» партиясы төрағасының бірінші орынбасары Мұхтар Құл-Мұхаммед, жер мәселесі төңірегінде партия тарапынан қолға алынып жатқан шараларға тоқталды.

«Елбасы үкіметке, қоғамдық ұйымдарға, саяси партияларға осы заң жобасын халықпен біріге отырып, егжей-тегжейлі талқылауды және заңды – нағыз «халықтық заң» етіп қабылдауға тапсырма берді. Осыған байланысты еліміздегі барлық партиялар осы заң жобасын талқылауға кірісіп кетті», - деп атап өтті М. Құл-Мұхаммед. 

«Нұр Отан» партиясы да еліміздің барлық өңірлерінің, барлық аудандарында, әр түрлі деңгейдегі мәслихаттар мен қоғамдық қабылдауларда, еліміздің ең жоғарғы заң шығарушы органы – Парламентте - аталмыш жобаны талқылап, халыққа түсіндірме жұмыстарын жүргізуді бастап кетті.

«Бұл заң тек саяси партиялар мен қоғамдық ұйымдардға ғана емес, ең алдымен жерде қызмет ететін адамдарға қатысты. Сол себепті де бұл заңды, осы салада тәуелсіздік жылдары мол тәжірибе жинақтаған, кәсіп ашқан, жерді жалға алған және өзінің кәсібін де, нәсібін де осы жерден тауып отырған азаматтар арасында талқылауымыз керек. Алдағы уақытта осындай азаматтармен кездесу үшін, еліміздің әртүрлі өңірлеріне шығатын боламыз», - деп мәлімдеді партия төрағасының бірінші орынбасары.

Сонымен қатар, қоғамда орын алып отырған «жерді шетел азаматтарына сату», - деген алып-қашпа сөздің, қолданыстағы заңда да, ұсынылып отырған заңда да жоқ екендігін баса айтты.

Даурен Бекбол

Сурет tengrinews.kz сайтынан алынды