Құрбан айт мерекесі ізгілік пен тазалыққа шақырады

ATPress.kz. 12 қыркүйек. Атырау облысының әкімі Нұрлан Ноғаев тұрғындарды Құрбан айт мерекесімен құттықтады.

Нұрлан Ноғаев бұл мейрамның ізгілік пен тазалыққа шақыратын ерекше мереке екенін атап өтті.

- Құрбан айтта халық Оразада тілеген тілектері мен ниетінің қабыл болуын сұрайды. Халқымыз елдің бірлігі үшін, отбасыларының амандығы үшін ниет етіп құрбандық шалып жатыр. Бұл мереке ізгілік пен шуақтың ерекше төгілетін кезеңі. Ниетіміз қабыл болсын, тілектеріміз орындалсын.  Отбасыларыңызға амандық, дендеріңізге саулық болсын. Құдайдың шапағаты нұр болып жауа берсін, – деді Нұрлан Ноғаев.

Аймақ басшысы, сонымен қатар, еліміздің тату-тәтті ғұмыр кешіп отыруының себебі бірлікте екенін айтты.

- Құрбан айт мерекесіне еліміз тыныштық, тұрақтылық жағдайында жетіп отыр. Елбасымыздың жасампаз саясатының арқасында халқымыз ешкімнің ұлтына, нәсіліне, дініне қарамай тату-тәтті тіршілік кешуде. Еліміздің руханият әлемінде айтатын сөзі, орны бар. Мемлекет басшысы әлемдегі дін өкілдерінің басын қосып, еліміз түйткілді мәселелерді шешу жолында қозғалып жатыр. Қазақстан қазір тұрақтылық пен жасампаздық ерекше үлгісін көрсетіп отыр, – деді әкім.

Айта кетелік, Құрбан айт мейрамы биыл 12-14 қыркүйек аралығында тойланады. Үш күн бойы барша мұсылман халқы Құрбан шалып, Жаратқанға жақындауға тырысады.

Камила Силыбаева