Отбасылық кәсіптің - жарқыраған айнасы

ATPress.kz. 1 маусым. Өңірлік коммуникациялар қызметі мен «Даму» кәсіпкерлікті дамыту қоры» ұйымдастырған баспасөз-туры барысында журналистер «Джанахметова» жеке кәсіпкерлігінде болды.

Кәсіпкерлік директоры Мария Джанахметова өз шағын бизнесін 90-шы жылдары суреттер, хрусталь бұйымдар сатудан бастаған. Кейін жұбайымен бірге азық-түлік дүкендеріне арналған тоңазытқыш пен тауарлық құрылғылар жеткізумен айналысқан.

- Біраз уақыт өткеннен кейін, жиһаз, тауар құрылғыларын, суреттерге арналған рамалар, сонымен қатар әртүрлі өлшем мен пішіндегі айналарды дайындау және құрастырып сататын  өз отбасылық кәсібімізді бастадық, - деді жеке кәсіпкер Мария Джанахметова. 

2015 жылдың мамыр айында М. Джанахметова банктен, Ұлттық қор есебінен, жылдық мөлшерлемесі 6 пайыз болатын, кәсіпкерлікті қолдау және дамытуға бағытталған, 7,9 млн. теңге көлемінде кредиттік қарыз алады. Несиені рәсімдеу кезінде кәсіпкер кепілзаттық қамсыздандырудың жетіспеушілігінің салдарынан қиындыққа тап болды. «Даму» қоры қарыздың 30 пайызы болатын, 2 млн. 370 мың теңге көлемінде кепілзат ұсынды.

- Кредиттік қаражатты фацет және әйнек пен айнаға декоративті жиек дайындауға арналған фацеттік құрылғы сатып алдық. Өндіріс аясын кеңейту және жұмыс орындарын ашу үшін қосымша және қосалқы құрылғылар алу жоспарда бар, - деп ойымен бөлісті М. Джанахметова.

Қазіргі таңда отбасылық кәсіп 30 адамды жұмыспен қамтып отыр.

ATPress.kz

Сурет Рахим Қойлыбаевтыкі