Облыс әкімі Германия елшісімен кездесті

ATPress.kz. 31 мамыр. Атырау облысының әкімі Нұрлан Ноғаев Германияның Қазақстандағы елшісі Гидо Херцпен кездесті.

Кездесу барысында тараптар екі елдің әлеуметтік, мәдени және экономикалық саладағы қалыптасқан қарым-қатынастары туралы талқылады. Облыс әкімі герман дипмиссиясының басшысына Атырау облысындағы шетел инвесторларына жасалып жатқан мүмкіндіктері туралы айтып берді. Әңгіме негізінен «Ұлттық индустриялық мұнай-химиялық технопарк» арнайы экономикалық аймағы жөнінде өрбіді.  

- Бұл аймақта инфраструктуралық объектілерді салу, химиялық, мұнай-химиялық, аралас және біріккен өндірістерді дамыту жоспарланып отыр, - деді облыс әкімі Н. Ноғаев.

- Елбасының тапсырмасымен елде инвесторларға арнайы экономикалық аймақ, төмен салық төлемдері, инвестициялық жеңілдіктер түріндегі қолайлы  мүмкіндіктер жасалып отыр. Атырау облысында қызмет етіп жатқан әлемдік алпауыт компаниялар соның дәлелі бола алады. Осы тұста германиялық компанияларды аймақта біріккен кәсіпорандар ашу арқылы өздерінің жұмыс істеу географиясын кеңейтуге шақырамын, - деп толықтырды өз сөзін Атырау облысының әкімі Нұрлан Ноғаев.

Кездесуде қазіргі таңда Атырауда неміс капиталының үлестік қатысымен 21 кәсіпорын тіркелгені айтылды. Атырау облысы мен Германия Федеративтік Республикасы арасында қаңтар-наурыз айларындағы тауар айналым 161,7 млн. АҚШ долларына жетті,бұл өткен жылмен салыстырғанда 4,5 есе артық.

- Біз компанияларымыздың экономикалық байланысын кеңейтуге және алдағы уақыттағы шағын және орта бизнесті, және де бизнес-серіктестікті дамытуға мүдделіміз, - деді Гидо Херц.

Кездесу аяқталғаннан кейін Нұрлан Ноғаев келген қонақтарды қыркүйек айында ұйымдастырылатын «Atyrau Invest-2016» халықаралық инвестициялық форумына қатысуға шақырды.

ATPress.kz