Мүгедектерді жұмыспен қамтыған кәсіпкер

ATPress.kz. 30 мамыр. Өңірлік коммуникациялар қызметі мен «Даму» кәсіпкерлікті дамыту қорының» ұйымдастыруымен өткен пресс-тур аясында журналистер «Бум-2020» жеке кәсіпкерлігінде болып қайтты.

2014 жылы тіркелген кәсіпкерліктің негізгі бағыты тамақ өнімдеріне арналған, экологиялық таза қағаз пакеттер өндіру. Кәсіпкерлік директоры Ақмарал Байлауованың айтуынша, қағаз пакеттер шығаратын құрылғыны алу үшін, «Бизнестің жол картасы 2020» кәсіпкерлікті қолдау мен дамытудың бірыңғай бағдарламасы бойынша, қаржыландыруға өтініш беріп, 3 млн. теңге көлемінде несиелік қарыз алған.

«Даму» қорындағы» «Бизнес-Кеңесші» жобасы бойынша оқудан өтіп, «Бизнестің Жол Картасы 2020» бағдарламасы аясында, 2 млн. теңге көлеміндегі мемлекеттік грантқа ие болдым. Ол қаражатты бизнесті дамытуға жұмсадым. Цехта 9 адам еңбек етеді. Олардың  алтауы, мүмкіндігі шектеулі жандар», - деді А. Байлауова.

Қазіргі таңда кәсіпкер Бизнес-инкубатор аумағынан жұмыс орнын жалға алып отыр. Алдағы уақытта жұмыс орындарын арттыру және бизнес аясын үлкейту жоспарда екенін атап өтті.

«Қазір жергілікті атқарушы органдардың көмегімен Тасқала елді мекенінен жер телімін алдым. Ол жерге үлкен цех салып, макулатура қабылдайтын боламыз. Өйткені қазіргі таңда біз қағазды Ресейдің Троицк қаласынан алып отырмыз. Егер цех жұмысы ойдағыдай жүретін болса, онда қағазды өзіміз өндіріп, өзіміз өңдеп, «Қазақстанда жасалған» деген атаққа толықтай ие боламыз. Сонымен қатар, жаңа жұмыс орындарын ашпақпыз», - деп жоспарымен бөлісті кәсіпкер.

ATPress.kz

Сурет Рахим Қойлыбаевтыкі