Ұлы Отан соғысы жылдарында Қазақстан басқа да КСРО республикалары сияқты Жеңіске жету үшін бар күшін салды.
Сол сарбаздардың бірі, жерлесіміз, Қызылқоға ауданының тұрғыны Мақыбай Алтыбаев соғыста ерлікпен қызмет етіп, елге аман-есен оралды. Ол 1903 жылы Гурьев уезіндегі Жарыпшыққан өзенінің бойында дүниеге келген. 1911-1915 жылдары ағалары Макаш, Елеш және Сәду Доссор мен Мақат мұнай кәсіпшіліктеріне жұмысқа кеткенде, ол мал бағып қалған. 1938 жылы Гурьев облысы құрылған кезде, Ойыл өзенінің түстігіндегі аумақ Мақат ауданына берілген.
1941 жылдың желтоқсан айында ол Қызыл Армия қатарына шақырылып, 211-атқыштар дивизиясының 829-артиллериялық полкінің құрамына қосылып, әскери машықтанудан өтті. 1942 жылдың мамыр айында дивизия Орел облысында неміс әскерлерімен алғашқы шайқастарына қатысты.
1943 жылдың жазында дивизия Курск иініндегі қорғаныс ұрыстарында болып, күзде Чернигов қаласын азат етуге қатысты. Десна өзенін өту кезінде және Чернигов тасжолындағы маңызды учаскені алу кезінде ерекше ерлік көрсеткені үшін дивизияға «Чернигов» атағы берілді.
Бұдан кейін дивизия Днепрдің оң жағалауындағы плацдармды кеңейтуге, Житомир-Бердичев, Каменец-Подольск, Проскуров-Черновицк, Львов-Сандомир шабуылдау операцияларына қатысты. КСРО шекарасынан өткен соң, дивизия 1-гвардиялық армия құрамында Чехословакия аумағында соғысты жалғастырды.
1945 жылдың мамыр айында дивизия Прага операциясына қатысып, 11 мамырда Прага толық азат етілді. Мақыбай Алтыбаев «Праганы азат еткені үшін» және «Германияны жеңгені үшін» медальдарымен марапатталып, 1945 жылдың 31 тамызында елге оралды.
1944 жылдың 17 қыркүйегінде оның ерлігі үшін 829-артиллериялық полк командирі капитан Капрановтың №038/н бұйрығымен «Ерлігі үшін» медалімен марапатталды және ІІ дәрежелі Богдан Хмельницкий орденін алды. Марапаттау қағазында қатардағы жауынгер Мақыбай (Махабай) Алтыбаевтың шабуыл кезінде азық-түлік пен жабдықтарды уақытында жеткізіп отырғаны айтылды.
Елге оралған соң ол мал шаруашылығымен айналысып, қой бақты. 1961 жылы ұлы Мақсоттың қасына көшіп барып, Энгельс атындағы совхозда жұмыс істеді. Жасы келген соң құрметті демалысқа шықты. Ұлы Жеңістің 40 жылдығына орай ІІ дәрежелі «Отан соғысы» орденімен және мерекелік медальдармен марапатталды.
Мақыбай Алтыбаев 1992 жылы қайтыс болды, ал оның ұрпақтары аталарының ерліктерін әрдайым еске алады.
Орақ ДЕҢГЕЛБАЕВ, өлкетанушы
Фото atr.kz