Қанат Ислам: «Мен де интернатта жатқанмын»

ATPress.kz. 11 қараша. Бүгін Атыраудағы С.Қазыбаев атындағы балалар үйінде кəсіпқой боксшы Қанат Ислам интернат тəрбиеленушілерімен кездесті.

- Интернатта жатудың жағдайын, ата-анадан жырақ жүрудің қандай екенін жақсы түсінемін. Мен де 11 жасымнан бастап спортқа дайындалу мақсатында интернатта тұрдым. Өйткені, асқақ арманым болды. Сол мақсатқа жету үшін талай қиындықты да өткердім, - деді Қанат Ислам, балаларға жігер беріп. 

Ел намысын қорғап жүрген боксшыны балалар үйі əкімшілігі мен тəрбиеленушілер, интернат түлектері құрметпен қарсы алды. Мектеп ұжымы чемпионның иығына шапан жапса, тәрбиеленушілер өнерін көрсетіп, қолтаңбасын алды.

- Интернатта спортпен шұғылданатындар саны басым. Баскетбол командамыз интернаттар арасындағы республикалық жарыстан екінші орынды иеленді. Тағы бір тəрбиеленушімізді танымал жаттықтырушы Рашид Мусин қамқорлыққа алып, Алматы қаласында грек-рим күрес түріне баулып жатыр, - дейді С.Қазыбаев атындағы балалар үйінің директоры Сания Мусиева. 

- Мұнда келгендегі мақсатымда интернат балаларына жігер беріп, олардың болашағына қанат бітірейін деген ой болды. Өзімнің де балаларым бар. Дегенмен, жанұяммен кеңесіп болашақта бала асырап алу ойымда бар. Ол әр отбасының борышы болуы тиіс, - деді Қанат Ислам. 

Кездесу барысында танымал боксшы балалар үйіне түрлі түсті теледидар сыйлығын табыс етіп, тәрбиеленушілердің өнерлерін тамашалады.

Нұрбейбіт Нұғыманов

Сурет автордікі