Атыраулық қыздар - әлем чемпиондары

ATPress.kz, 19 қазан. Атыраулық қыздар әлем біріншілігінде топ жарды. Чемпиондарды кеше теміржол вокзалында облыстық спорт басқармасы қызметкерлері мен жанкүйер достары күтіп алып, жеңісіне сай құрмет көрсетті.

Саида Қапсалихова мен Эльмира Самиголлаева самбодан Атыраудың алғашқы әлем чемпиондары. Румынияның Бухарест қаласында әйелдер арасында өткен жарысқа әлемнің 35 мемлекетінен 350 ден астам спортшы қатысты. Дүбірлі додаға Қазақстаннан 20 спортшы аттанса, қос жүлделі 1-ші орынды атыраулықтар еншілеп отыр. Саида Қ.Дүтбаева атындағы педагогикалық колледждің студенті. Анасы қарсылық білдірсе де 12 жасынан бастап осы спорт түрімен айналысып келеді. Батыл қыз әлем чемпионатындағы алғашқы сапарында 3 жекпе-жек өткізіп, үшеуінде де айқын басымдықпен жеңіп отыр. Ал, Эльмира 72 келі салмақта өнер көрсетті. Спортшы қыздарды бапкері Мейіржан Есмағанбетов 6 жылдан бері самбо, дзюдо күресіне баулып келеді. Бүгінде Балықшы ықшам ауданындағы спорт мектебінде самбо спортына 10 қыз тәрбиеленсе, Саида мен Эльмира - Мейіржанның алғашқы әлем чемпиондары. Жеңімпаздардың ендігі арманы - дзюдо күресі бойынша Токио қаласында өтетін олимпиадада топ жарып, қазақтың туын көкте желбірету.
Нұрбейбіт Нұғыманов