Өзен үстіндегі түнгі селфи

ATPress. 15 мамыр. Атырауда Жайық өзенінде төрт адам мінген қайық ауып кетті. Тірі қалғандардың айтуынша, олар достар болып түнгі өзеннің үстімен серуендеп, суретке түспек болған.

Сенбіден жексенбіге қараған түні қала сыртындағы Бесікті поселкесі аумағында төрт жігіт мінген қайық ауып кеткен. Олардың екеуі жағаға өз күштерімен жүзіп шыққан. Ал тағы екеуі суға батып кеткен. Бұл туралы ATPress редакциясына Батыс аймақтық аэромобильдік жедел құтқару отряды (БААЖҚО) жетекшісі Бахтияр Қадырханов мәлімдеді.

«Аман қалған жігіттердің айтуынша, суға кеткен қала сыртындағы Бірлік поселкесінің 1992 және 1981 жылғы екі тұрғыны. Олардың айтуынша, достарымен сенбі күні кешке табиғат аясына шыққан. Түнде қолдан жасақталған қайықпен өзен үстіне шыққан. Өздерінің спирттік ішімдік ішкендерін біреуі мойындап отыр», - деп баяндап берді Б. Қадырханов.

Оның айтуынша, оқиға туралы ақпарат құтқарушыыларға түнгі сағат екілер шамасында келіп түскен. Таң ата суға кеткен денелерді іздеу жұмыстары басталған. Оқиға орын алған жерде және соған жақын аумақта БААЖҚО-ның жеті сүңгуір-құтқарушысы іздеу жұмыстарын жалғастыруда. Оқиға болған жерге үш қайық және екі басқа техника, сонымен қатар балық инспекциясының «КС» маркалы катері жұмылдырылған.

ATPress

Суретті түсірген Рахим Қойлыбаев