Жұмекен шығармаларын жатқа оқудан сынға түсті

АTPress.kz. 9 желтоқсан. Жұмекен Нәжімеденов атындағы көркемсөз оқу шеберлері республикалық байқауының бас жүлдесі мен 300 мың теңге сертификаты алматылық студент Гүлім Садырбековаға бұйырды.

Атырау облысы әкімдігінің қолдауымен Махамбет атындағы қазақ драма театрында өткен байқауға республиканың әр облысынан 17 үміткер қатысып бағын сынады. Шара барысында сөз алған аймақ басшысы Нұрлан Ноғаев:

- Жұмекен Нәжімеденов атындағы көркемсөз оқу шеберлерінің республикалық байқауы Атырауда алғаш рет ұйымдастырылып отыр. Байқау негізінен ел тәуелсіздігінің 25 жылдығына арналған. Келесі жылы байқаудың дәстүрлі өтуіне ықпал жасайтын боламыз, - деді. 

Байқауға қатысушылар Жұмекен шығармаларынан бір поэзия, бір прозадан үзіндіні жатқа оқудан сынға түсті. Талапкерлердің өнеріне ҚР Мемлекеттік сыйлығының иегері, жазушы Қажығали Мұханбетқалиұлы, Халықаралық «Алаш» әдеби сыйлығының иегері, ақын Серік Тұрғынбекұлы, ҚР Президенті сыйлығының лауреаты, жазушы Мереке Құлкенов, филология ғылымдарының докторы, ақын Қадір Жүсіп және Атырау облыстық мәдениет, мұрағаттар және құжаттама басқармасының басшысы Әбіл Жоламанов қазылық жасап, бағасын берді. 

- Жұмекен өте күрделі ақын. Ақын шығармаларының табиғатын түсініп оқымаса тыңдарман жүрегіне жетуі қиын. Осы тұрғыдан келгенде бүгінгі көркемсөз шеберлері ақын шығармаларын өздеріне лайықты таңдай білген. Үлкен дайындықпен келгендері аңғарылып тұрды. Әсіресе, бізді Жұмекен шығармаларының жас оқырмандар арасына келгендігі қуантып отыр, - дейді қазылар алқасының мүшесі Серік Тұрғынбекұлы.  

Байқау қорытындысы бойынша, атыраулық үміткер Нәзира Әшім бірінші орынды еншілеп, 150 мың теңге сертификатына ие болса, Ақмола облысынан келген Перизат Мұратқызы мен маңғыстаулық Айдос Жұмабаев жүлделі екінші орынмен қоса жүз мың теңгелік сертификатын жеңіп алды. Ал, атыраулық Нұрдәулет Табылдиев, Шығыс Қазақстандық Арайлы Алтаева, Оңтүстік Қазақстаннан келген Назерке Құлжабаева өзара үшінші орынды бөлісіп, әрқайсысы 70 мың теңге сертификатына ие болды. 

Нұрбейбіт Нұғыманов

Сурет автордікі