«Музейдегі түн»

ATPress. 17 мамыр. Ертең - Халықаралық мұражайлар күні. Осы атаулы датаға байланысты Атырау облысы тарихи-өлкетану мұражайы жылдағы дәстүр бойынша «Музей түні» шарасын өткізуді жоспарлап отыр.

Бұл туралы ATPress редакциясына мұражай басшысының ғылыми істер жөніндегі орынбасары Аймуканова Күміс мәлімдеді. 

- Атырау  облысы тарихи-өлкетану мұражайында Халықаралық музейлер күніне орай 18 мамыр сағат 18.00-23.00 аралығында «Музей түні»  өткізіледі. Бұл шараның негізгі мақсаты - Атырау облысының тұрғындары мен қала қонақтарын өлкеміздің тарихы, мәдениеті, табиғаты, этнографиясы және  археологиясымен тереңірек таныстыру, жергілікті зергер, қолөнер шеберлерінің туындыларынан көрме – жәрмеңкесін ұйымдастыру арқылы көпшілікке насихаттау, - деп атап өтті К. Аймуканова.

Бұдан бөлек, шара барысында көрермендерге арналып түрлі шаралар мен әртүрлі бағыттағы шеберлік сабақтары ұйымдастырылмақ.

Д. Бекбол

Сурет мұражай қорынан алынды