Атырауда түсірілген жаңа мелодрама

Жуырда қазақ киноөндірісінің қатары Батырбек Шеркешбаевтің сценарийімен түсірілген "Екі қадам" атты мелодрамамен толығады. Бұл жөнінде жас режиссер Таймас Сапарғали AtyrauPress тілшісіне берген сұхбатында мәлім етті.

- Кинода өмірін енді бастаған екі жігіттің тағдыры баяндалады, - дейді Таймас Сапарғали. - Фильмде отбасын енді құрған Арлан есімді жігіт, көлік жолындағы кішкентай баланы құтқармақшы болып мүгедек болып қалады.

Екінші кейіпкер, фильмнің сюжеті бойынша, спортпен айналысып, чемпион болып, табыс көзі үшін кешкі клубта күзетшілік қызмет атқарып жүрген азамат. Жұмыстан шығып келе жатқанда, ол бес-алты балалардың бір қызға ұрынып жатқанының куәсі болады, көмектесемін деп ұмтылғанда, бұзақылардың біреуі арқасынан пышақ тығып алып, өмір бойы жүре алмайтын жағдайға ұшырайды. Қос тағдыр баяндалатын кино арқылы сүйікті жар табу, неке қию, жұмысқа орналасу, қиындыққа төтеп беру, жастарға мотивация, күш беру, өмірден түңілмеуге биімдеу мәселелері баяндалады.

Жас режиссердің айтуынша, кастинг сәуір айында Шыныбек Рахмаш, Батырбек Шеркешбаевпен екі күн бірге өткізілді. Жарнама Интернет жүйесі арқылы арқылы таратылды, таланттар шығады-ау деген оқу орындарына да хабарландырулар жабыстырылды.

Басты рөлдерде Астанада орналасқан "Шабыт" Қазақ ұлттық университетнің 4 курс студенті, Бауыржан Ибрагимовтың шәкірті - Нұрберген Қабдолла (өнер жолында Нұркен Қожа аталып жүр) мен "Жүсіпбек Елебек" цирк колледжінің 2 курс студенті Шыныбек Рахмаш ("Студенттік кез" 40-минуттық киносында басты рөлді ойнаған) сомдаған.

- Алдағы уақытта әзіл жанрындағы кино түсіргіміз келеді. Бірақ, сценарий мен идея дайын болғанымен қаржы жоқ, - дейді автоматтандыру мен басқару мамандығын тәмамдаса да өнерге бет қойған талант. - Себебі, оның ішінде Қазақстанның басқа қалаларынан түсірілетін кадрлар декорациясы, әртістердің киімдері, монтаж жасайтын күрделі анимацияларды жасайтын мамандар шақыру керек.

Жаңа дүниенің тұсаукесері, қарашаның 12-13 жұлдызы, кешкі сағат 18.00 уақытында Құрманғазы мәдениет сарайында өтеді.

 

Нұргүл Сағындық

Фильмнен кадрлар