Махамбет ауданы 25 жылда қалай өзгерді?

АTPress.kz. 12 желтоқсан. Егемендігімізді алған алғашқы жылдармен салыстырғанда Махамбет ауданындағы ауылшаруашылығының жалпы өнім көлемі 244 есеге артқан. Шағын ортакәсіпкерлік субъектілерінің саны 71 есеге ұлғайып отыр.

Бұл туралы Өңірлік коммуникациялар қызметінде болған брифинг барысында айтылды. 

«Махамбет ауданы ауылшаруашылығына қолайлы өңір болғандықтан аймақтың ауыл тұрғындары да кәсіпкерлікке бейім келеді. Бүгінде  шаруашылықтардағы егістіктен алынған өнімдер екі есеге, мал шаруашылығында өндірілген өнімдер үш есеге дейін артып отыр. Бұл көрсеткіштер мемлекет тарапынан көрсетілген қаржылай қолдаудың нәтижесі, - дейді Махамбет ауданы әкімінің орынбасары Азамат Айманакумов. 

Соңғы 15 жыл ішінде аудандағы тұрғын үй құрылысы сегіз есеге артқандығын аңғаруға болады. А.Айманакумовтың мәліметіне сүйенсек, биылдың өзінде 22 мың шаршы метр тұрғын үй пайдалануға берілген. 

«Қазір аудан бойынша тұрғын үй кезегінде 523 адам тұр. Сұранысты кезең-кезеңмен қанағаттандыру үшін аудан орталығынан демеушілер есебінен үш қабатты 60 пәтерлік тұрғын үйдің құрылысы жүргізілуде. Тағы осындай екі үйдің жобалау-сметалық құжаттамасы жасақталып жатыр», - деді Махамбет ауданы әкімінің орынбасары Азамат Айманакумов.

Мереке Асанова

Сурет Рахым Қойлыбаевтікі