Кәсіп түбі – нәсіп

ATPress.kz. 25 тамыз. Гүлмира Құрманғалиева: «Облыс орталығында стамотологиялық кабинеттердің көптігіне қарамастан, ауданға ат арылытып келетін емделушілер бар. Ұялы телефоныма қоңырау шалып, өтініштерін айтатындар, қабылдауға жазылушылар аз емес».

Гүлмира Құрманғалиева жөнінде (суретте) ATPress.kz редакциясы өткен жылдың қараша айында баяндаған болатын. Жеке кәсіпкер ретінде тіркеліп, Махамбет ауданындағы Алмалы поселкесінде жұмысын бастаған ол стоматологиялық кабинет ашты. Алдымен, 2014 жылдың наурыз айында коммерциялық нысан салу мақсатында 0,01 га көлемді жер телімін рәсімдеді.  Араға жыл салып 3,5 млн. теңге көлемінде несие алу үшін екінші деңгейлі банктердің біріне барып жолығады. Бұл қаражатты стамотологиялық кабинет пен оған қажетті құрылғыларды сатып алуға жұмсамақшы еді. Мемлекет кәсіпкердің бастамасына қолдау білдірді. Бірінші болып «Даму» КДҚ несиеге берілетін соманың  2 млн. 450 мың теңгесіне кепілдік ұсынды. Несие жылына  14% сыйақы мөлшерімен берілген болса, бүгінде оның 7% мемлекет өтеуде. 

Алмалы поселкесінде тұрғындар саны төрт мыңнан асады. Дәрігерлік амбулатория болғанымен, тіс дәрігерінің жоқтығы халықтың басты мұқтаждықтарының бірі болатын. Сондықтан, ауруы жанына батқандар  беймезгіл уақытта болса да 15 шақырым қашықтықтағы Атырау қаласына қатынауға мәжбүр. Оның өзінде ұзын сонар кезекті тосу бейнеті бар. Қазір поселкедегі тіс дәрігері демалыс күндері де жұмыс жасайды. Көп емделушілер алдын ала жазылуды дағдыға айналдырған. 

Осы аптада өңірлік коммуникация қызметі мен облыс әкімдігінің баспасөз қызметінің ұйымдастыруымен бір топ тілші Алмалы поселкесіндегі тіс дәрігерінің жұмысымен танысып қайтты. Гүлмира нарықтағыдан жоғары баға қойған емес. «Тіпті арзанырақ», - дейді өз жұмысында ауыл азаматтарының жағдайын ескеріп жүрген кәсіпкер. Жұмыссыз азаматы бар немесе көп балалалы отбасы мүшелерінің қалада қойылатын қымбат бағаларды қалтасы көтере бермесі анық. Гүлмираның айтуынша, кейде күніне бес, кей күндері он емделушіге дейін жазылады.  

- Тек Алмалы тұрғындары емес. Айталық, Береке  ауылынан келеді. Біраз азаматтар Атырау қаласынан қатынап жүр. Қалада таңдау көп болғанымен, сапасы немесе қызмет құны кез-келген жанның көңілінен шықпауы мүмкін. Сондықтан, өтініш білдірген адамға қолымнан келгенше көмек жасап келемін, - дейді кәсіпкер Г.Кұрманғалиева. 

ATPress.kz

Фото Рахим Қойлыбаевтікі