29 қазан – Дүниежүзілік инсультке қарсы күрес күні

Елімізде инсульт алғандардың қатары көбейген, деп хабарлайды ATPress.kz

Дәрігерлер бұрын бұл дертке көбіне егде тартқан жандар шалдықса, соңғы жылдары олардың қатарына жастардың да қосылғанын айтып дабыл қағуда. Бүгін дүниежүзілік инсультке қарсы күрес күніне орай Атырау облыстық ауруханасының дәрігер-неврологы  Нұрсәуле Канафинамен сұхбаттасып қайттық.

Аталған аурудың алғашқы белгілері қандай?

F-fase-бет. Науқастан  күлуін сұраймыз, сол кезде ауыз бұрынышың қисаюы байқалады.

А-arms-қол. Науқастан қолдарын созуды сұраймыз, бір қолының әлсіздігі байқалуы мүмкін.

S-speech-сөйлеу. Қарапайым сөздерді айтқызып қараймыз, сөйлеу кезінде тіл күрмеленуі байқалады.

T-time-уақыт. Осы симптомдардың біреуі байқалған болса, жедел-жәрдем шақырамыз.

Инсульттің қандай түрлері жиі кездеседі?

Инсульттің 2 түрі бар. Геморрагиялық (қан құйылу) және ишемиялық. Ишемиялық түрі жиі кездеседі (80%)

Алғашқы көмекті қалай ұсынуға болады?

Дәрігер келгенше науқасты жатқызып, басын 30 градусқа көтеріп, кеудесін тығыз киімдерден босатып ауа келуін қамтамасыз ету керек.

Қазіргі таңда инсульттің жастар арасында кездесу себебі неде?

Расымен, қазір инсульт «жасарып» барады. Себебі:

1.     Зиянды әдеттер (темекі және кальян шегу, алкогольдік ішімдіктер ішу)

2.     Гиподинамия  (аз қозғалу)

3.     Семіздік

4.     Қан қысымы немесе қант диабеті болса оның емін қабылдамаудың соңы осыған әкеледі.

Тәжірибеңіздегі инсульт алған ең жас науқас туралы айта кетсеңіз

Ең жас науқасым – 22 жаста. Ишемиялық инсультпен түсті. Келген кезде оң қолымен аяғы әлсіз болып, сөйлей алмады. Ишемиялық инсультпен түскен науқастарға, егер алғашқы 4-5 сағатта ауруханаға келсе, тромболитикалық дәрі енгіземіз (қарсы көрсеткіштер болмаса). Сол тромб ерітетін дәрінің арқасында науқас толық жазылып, кеше үйіне шығарылған болатын.

Бүгінгі күні Атырау облысы бойынша инсультпен ауырғандардың статистикасы қандай?

Статистика бойынша Атырау облысында жылына шамамен 1300 адам инсульт алады. Аурудың 20% өлімге, 70-80% мүгедектікке әкеп соғады.

Инсульттың құрбаны болмас үшін не істеу керек?

Салауатты өмір салтын ұстану, зиянды әдеттерден арылу, дұрыс тамақтану (фасфуд, газдалған сусындар, спирттік ішімдіктер қолданбау). Қан қысымы мен қант мөлшерін қадағалау және уақытылы ем қабылдау. Дәрігерлік есепте тұрған науқастар ай сайын тұрғылықты жері бойынша дәрігерлік бақылаудан өтуі шарт.

Пандемияның өршіп тұрған уақытында денсаулыққа аса сақтықпен қарауға кеңес беремін.

Айша Кенжемұратова