Батырлар жекпе-жекте бағын сынады / ВИДЕО

АTPress.kz. 16 қаңтар. Кеше Атырау қаласындағы «Мұнайшы» спорт кешенінде ұлттық спорт түрі – жекпе-жектен - ересектер арасында облыстық турнир аяқталды.

Спортшылар арасында тәжірибе алмасу мақсатында өткізілген батырлар додасына Атырау қаласындағы спорт клубтары мен Жылыой, Құрманғазы, Индер аудандарынан 80 астам спортшы қатысты. Олар он түрлі салмақ дәрежесі бойынша сынға түсіп, ақтық сынға өткен жиырма спортшы Қазақстан чемпионатына жолдама алды. Енді олар 24-27 ақпан күндері Атырау қаласында өтетін жекпе-жектен Қазақстан чемпионатында Атыраудың намысын қорғайтын болады.

- Жекпе-жек - батыр бабаларымыздың ежелгі спорты. Ол -  тарихқа құрмет, досқа адалдық, қарсыласқа әділдіктің белгісін көрсетеді. Қазір жекпе-жектің арнайы ережесі бар. Бұл спорт түріне балаларды 7 жастан бастап баулимыз. Оларды рухани тәрбиелеуіміз қажет. Қазір шыбық тимес шыңқ етерлер көбейіп кетті. Түртіп кетсең құлай кетеді, ырбиып жылай кетеді. Кешегі бабаларымыз қайсарлығын жекпе-жекте дәлелдеген. Бұл жігіттер де сегіз бұрышта бір-бірімен төбелескенімен сыртқа шықса айырылмас дос. Міне, рухани тәрбиенің ең маңыздысы осында, - дейді  Атырауға арнайы келген жекпе-жек ұлттық федерациясының директоры Ерназар Әлімбетов.

Облыстық жекпе-жек ұлттық федерациясының президенті Мадихан Бекенбетовтің айтуынша, алдағы уақыттарда Исатай, Құрманғазы аудандарынан жекпе-жектің филиалдарын ашу жоспарланып отыр.

Нұрбейбіт Нұғыманов

Сурет автордікі