Өңір басшыларының қатысуымен өткен кеңесте Президент Қасым-Жомарт Тоқаев келелі мәселелерді көтерді. Әсіресе, рухани құндылықтарымызды сақтау маңызды екеніне назар аударды.
«Халқымыздың дүние танымына сай дәстүрлі исламды дәріптеу аса маңызды. Оның ғылыми-теориялық негізін дамыту қажет. Өскелең ұрпақтың рухани тәрбиесін назардан тыс қалдыруға болмайды. Шын мәнінде, бұл – өте маңызды мәселе. Оны бетімен жіберсек, ұлттық салт-санамыздан айырылып қалуымыз мүмкін» деген сөзді Мемлекет басшысы жастарға қарата айтып отыр.
Расымен де, елдің ертеңі біз секілді қызығы мен шыжығы қатар өрбіген өмірдің жарқын парағын енді ашып жатқан жастардың қолында. Біз бүгін қандай іспен шұғылдансақ, кімдерден тәлім алсақ, қандай өнеге көрсек, мемлекетіміздің өсіп-өркендеуі де тікелей соған байланысты болмақ. «Ұяда не көрсең, ұшқанда соны ілесің» дегендей, азаматтық пайымы енді ғана қалыптастып келе жатқан жастардың күнделікті қалай тәрбиеленіп жатқаны аса маңызды. Олар кімді үлгі тұтады, кімдерге еліктейді, бұл да маңызды. Себебі, олардың санасы судың бәрін сіңіріп алатын губка секілді.
Ал, қоғамда ірікті салуды көздейтін көзге көрінбейтін неше түрлі топтар мен жекелеген адамдар болуы мүмкін. Солардан сақтану үшін жастар үлкен аға буын өкілдерімен тілдесіп, ақыл-кеңестерін алып отырса, артық етпейді. Тіпті, қос буын өкілдерін бір-бірімен кездестіріп, тұрақты диалог алаңын ұйымдастыруға да болады. Сол кезде олар өзара пікір алмасып, ой тарқатар еді. Үлкендердің білетінін жастар қалай білмесе, керісінше, жастардың білетінін үлкендер білмеуі мүмкін, соны да ескерген жөн.
Әділет ҚАНАТҰЛЫ, жас блогер