2025 жыл елімізде Президентіміздің бастамасымен «Жұмысшы мамандықтар жылы» деп жарияланды. Бұл бастама қоғамның еңбек адамына деген құрметін арттырумен қатар, елдің экономикалық дамуын қамтамасыз ететін жұмысшы мамандықтардың маңыздылығын қайта бағалауға үлкен серпін береді.
Қазіргі таңда энергетика және құрылыс салалары еліміздің инфрақұрылымдық және экономикалық тұрақтылығының негізі болып табылады. Электр станцияларының үздіксіз жұмыс істеуі, заманауи ғимараттардың салынуы, және жаңғыртылатын энергия көздерін дамыту – мұның бәрі жоғары білікті жұмысшы мамандардың қолымен іске асырылады. Дегенмен, соңғы жылдары осы саладағы мамандықтарға қызығушылық төмендеп, жұмысшылардың жетіспеушілігі өзекті мәселеге айналды. Президенттің бұл бастамасы осы мәселелерді шешуге бағытталған қадамдардың бірі. Жұмысшы мамандықтарды дәріптеу, оларға қажетті жағдай жасау, білім беру жүйесін жаңғырту арқылы жастардың осы мамандықтарға қызығушылығын арттыру басты мақсат.
2025 жылға қарай әлемдегі еңбек нарығы өзгерістерге ұшырап, жаңа талаптар туындайды. Цифрландыру мен автоматтандырудың өркендеуі көп салаларда адам еңбегін алмастыратын жаңа технологиялар мен жүйелерді әкелетіні белгілі. Бірақ бұл өзгерістердің арасында жұмысшы мамандықтардың маңызы артады. Атырау энергетика және құрылыс колледжі өз түлектерін дәл осы өзгерістерге бейімдей отырып, олардың заманауи техникалық дағдылар мен практикалық тәжірибені меңгеруіне жағдай жасайды.
2025 жылы энергетика, құрылыс, ақпараттық технологиялар және басқа да саладағы жұмысшы мамандар өздерінің құзыреттері мен білімі арқылы қоғамның тұрақты дамуына ықпал етеді. Мысалы, қазіргі уақытта жаңартылатын энергия көздері мен экологиялық құрылыс саласына деген сұраныс артып келе жатыр. Атырау облысы сияқты индустриалды аймақтарда жұмысшы мамандар жаңа технологиялар мен инновациялық шешімдерді енгізуде басты рөл атқарады.
Атырау энергетика және құрылыс колледжі өңірдегі ең беделді оқу орындарының бірі ретінде жұмысшы мамандықтарға деген жаңаша көзқарасты қалыптастыруда жетекші рөл атқаруда. Біз келесі бағыттар бойынша жұмыс атқарып келеміз:
- Заманауи оқу бағдарламалары: Оқу жоспарларын нарықтың талаптарына сай бейімдеп, жаңа технологияларды енгізіп жатырмыз.
- Материалдық-техникалық база: Оқу шеберханалары мен зертханаларды жаңа құрал-жабдықтармен қамтамасыз ету арқылы білім алушылардың тәжірибелік дағдыларын дамытуға мүмкіндік береміз.
- Жұмыс берушілермен әріптестік: Аймақтағы жетекші компаниялармен тығыз байланыс орнатып, студенттерімізді өндірістік тәжірибеден өткіземіз және оларды жұмыспен қамтуға көмектесеміз.
- Түлектерді қолдау: Колледжден түлеп шыққан мамандардың жұмысқа орналасу көрсеткіші жоғары. Біз олардың мансап жолында сәтті қадам жасауына барынша жағдай жасаймыз.
Колледждің оқу бағдарламаларын, материалдық-техникалық базасын және мүмкіндіктерін таныстыру мақсатында оқушылар мен ата-аналарға ашық есік күндері өткізіледі. Бұл шара аясында оқу шеберханалары мен зертханалары көрсетіліп, жұмысшы мамандықтардың тартымдылығы мен перспективалары туралы ақпарат беріледі.
Энергетика және құрылыс саласындағы жетекші мамандардың қатысуымен тәжірибелік семинарлар ұйымдастырылады. Бұл шара студенттердің кәсіби дағдыларын дамытуға, саладағы заманауи талаптармен танысуға және өз шеберліктерін арттыруға бағытталған.
Аймақтағы ірі кәсіпорындармен бірлесе отырып, түлектерді жұмысқа орналастыру мақсатында мамандық жәрмеңкелері өткізіледі. Бұл шара жұмыс берушілер мен студенттер арасында тікелей байланыс орнатып, еңбек нарығындағы сұраныстарды түсінуге мүмкіндік береді.
Жастар арасында жұмысшы мамандықтардың беделін арттыру мақсатында ақпараттық науқандар ұйымдастырылады. Әлеуметтік желілерде жұмысшы мамандықтардың артықшылықтарын көрсету арқылы оларды танымал етуге күш салынады. Серіктес кәсіпорындармен бірлескен жұмыстарды нығайту арқылы студенттер нақты өндірістік процестерге қатысады. Бұл олардың тәжірибелік дағдыларын жетілдіруге және болашақта жұмысқа орналасуына мүмкіндік береді. «Үздік жас маман», «Шебер құрылысшы» сияқты кәсіби байқаулар ұйымдастырылады. Бұл конкурстар студенттердің шығармашылық және кәсіби қабілеттерін ашуға, сондай-ақ оларды ынталандыруға бағытталған.
Халықаралық ынтымақтастық туралы келісім аясында колледж оқытушылары мен өндірістік оқыту шеберлері Ресей және Ставрополь өлкесінің оқу орындарымен бірлесіп өткізілетін семинарларға, дөңгелек үстелдерге, онлайн конференцияларға белсенді қатысуда.
2025 жылы колледжде жаңа техникалық мамандықтарды ашу бойынша жұмыстар басталып кетті. WorldSkills стандарттарына сәйкес энергетика, құрылыс және ақпараттық технологиялар бағытындағы жаңа кабинеттер ашу және оларды заманауи жабдықтармен қамтамасыз ету жоспарлануда.
Атырау энергетика және құрылыс колледжі 2025 жылы оқу бағдарламаларын жаңғырту және студенттерге заманауи өндірістік дағдыларды үйрету мақсатында бірнеше маңызды техникалық жабдықтарды сатып алуды жоспарлап отыр. Бұл жабдықтар колледждің материалдық-техникалық базасын жаңартып, студенттерге қазіргі заманғы технологиялармен жұмыс істеуге мүмкіндік береді. Жоспарлап отырған жабдықтар ішінде: цифрлық басқару станогы - өндірістік процестерді автоматтандыруға және жоғары дәлдікпен жұмыс істеуге мүмкіндік беретін құрал, студенттер цифрлық басқару станоктарында жұмыс істей отырып, металл, ағаш, пластик сияқты материалдарды өңдеу дағдыларын меңгереді; графикалық дизайн бағдарламалары мен жабдықтары-студенттерге графикалық дизайн саласындағы заманауи бағдарламалар мен құралдар арқылы көркемдік және техникалық жобаларды әзірлеу дағдыларын үйрету, бұл бағытта Adobe Photoshop, Illustrator, AutoCAD сияқты бағдарламалар пайдаланылуы мүмкін; қазіргі заманғы байланыс саласында маңызды рөл атқаратын ақпараттық кабельдік жүйелерге арналған құрал-жабдықтар, бұл жабдықтар студенттерге ақпараттық кабельдік жүйелерді орнату, конфигурациялау және диагностикалау бойынша заманауи дағдыларды меңгеруге мүмкіндік береді; мобильді робототехника - өндірістік процестерді автоматтандыру мен басқаруға арналған мобильді роботтарды сатып алу, бұл жабдық студенттерге роботтарды бағдарламалау, олардың жұмысын басқару және өндірістік тапсырмаларды орындау дағдыларын үйретеді; өндірістік автоматика - өндірістік процестерді басқару және автоматтандыру үшін қажетті жүйелер мен жабдықтар, бұл құралдар арқылы студенттер өндірістік процестердің тиімділігін арттыру және энергия үнемдеу технологияларымен танысады.
Бұл жабдықтар студенттердің кәсіби дағдыларын арттыруға, еңбек нарығында сұранысқа ие мамандарды даярлауға және колледждің материалдық-техникалық базасын жаңартуға мүмкіндік береді. Бұл бастама студенттердің біліктілігін арттыруға және олардың халықаралық деңгейдегі талаптарға сай білім алуына мүмкіндік береді.
Жұмысшы мамандықтар – тек ауыр еңбек емес, ол шығармашылық, жаңашылдық және даму мүмкіндігі мол сала. Әсіресе энергетика мен құрылыс салалары тұрақты табыс көзі ғана емес, еліміздің өркендеуіне қосқан үлкен үлес болып табылады.
2025 жыл жастар үшін өз болашағын айқындап, еңбек адамы ретінде мақтанышпен алға қадам басатын ерекше мүмкіндік. Біз жастарды жұмысшы мамандықтарды таңдап, еліміздің жарқын болашағын бірге құруға шақырамыз.
Джумагазиев Тухфатолла Махфузович
Атырау энергетика және құрылыс колледжінің директоры