Music Lab – жас музыканттарға арналған шығармашылық жоба. Оны Атырау облысы Ішкі саясат басқармасының қолдауымен Key transform ҚБ Kilen Creative Hub шығармашылық ұйымы серіктестігімен жүзеге асырды, деп хабарлайды AtyrauPress тілшісі.
Music Lab жобасының мақсаты – талантты жастардың музыкалық индустриядағы әлеуетін дамыту. 2024 жылы екінші рет жүзеге асырылған бұл жоба жастарға шығармашылық дағдыларды меңгеруге және авторлық әндерін кәсіби деңгейде жазуға мүмкіндік берді. Жобаға 100-ден астам өтінім келіп түсіп, оның ішінде 50 қатысушы іріктелді. Оның 11-і финалист атанып, жаңа ән жазуға мүмкіндік алды. Қатысушылар музыкалық продакшн, студиялық жазу, сахна өнері және өзін-өзі дамыту бойынша кешенді сабақтар алды. Оларға Қазақстанның танымал музыканттары мен продюсерлері тәлімгерлік етті.
Қатысушылар қатарында – Серік Сабиртай Абилов Алмаз Берді Зәкәрия Фатима Кәрім Мергенқызы Дарина, Умбеталиева Альмирa, Аманжол Ақбаян, Калиманов Султанбек, Самиголлаев Нурдаулет, Қуатова Аружан, Асылбеков Ануар бар. Олар 11 жаңа авторлық ән жазып, олар Apple Music, Spotify, Яндекс Музыка және YouTube Music платформаларында жарық көрді. Бұл – Атырау жастарының музыка әлеміне қосқан үлкен үлесі. Жобаның финалы 600-ден астам көрермен жиналған шығармашылық концертке ұласты. Қатысушылар LED-экрандармен сүйемелденген жанды дауыстағы қойылымдарын ұсынып, сахнада өз шеберліктерін көрсетті. Одан бөлек Kilen Creative Hub резиденттері, 2023 жылғы Music Lab қатысушылары және қазақстандық эстрада жұлдыздары сахнаға шықты. Осылайша концерт қатысушыларға өнер жолындағы болашақ қадамдарына үлкен серпін берді.
Music Lab жобасының қатысушылары жобаға қанағаттану деңгейі 96,4%-ды құрады. Бұл жоба Қазақстандағы жастардың шығармашылық дамуына қолдау көрсететін маңызды бастама ретінде танылды. Ол жас таланттарға жаңа мүмкіндіктер ашып, олардың өнерге деген қызығушылығын арттырды.
Амандық САҒЫНТАЙҰЛЫ
