Спорттың үздіктері анықталды

АTPress.kz. 26 желтоқсан. Жыл басынан бері Қазақстанның көк байрағын халықаралық, әлемдік додаларда желбіретіп келген атыраулық спортшылар марапатқа ұсынылды.

Салтанат сарайында ұйымдастырылған шара барысында облыс әкімі Нұрлан Ноғаев Атырау облысы халқының 25 пайызы бұқаралық спортпен айналысатындығын мақтанышпен атап жеткізді.

- Биылғы жыл Атырау облысының спорт саласы үшін жетістікке толы жыл болды. Атыраудан алғаш рет Олимпиада чемпионы шықты. Сіздерге еліктеп кейінгі ұрпақ бой түзеп келетінін ұмытпаңыздар. Қазақстанның гимні екі жағдайда шырқалса, оның бірі мемлекет басшысының өзге елдерге барған сапарында, екіншісі - спортшыларымыз жетістікке жеткен кезде болады. Көк туымызды төмен түсірмей, алға қарай да тыңбай еңбектеніп, өркендей берулеріңізге тілектестік білдіремін, - деді Атырау облысының әкімі Нұрлан Ноғаев.

Сонымен қатар, атыраулық спортшыларға әлемдік додаларда топ жарып жүрген Серік Сәпиев, Данияр Елеусінов, Елдос Сметов, Денис Тен, Василий Левит, Қанат Ислам секілді спортшылар үлкен монитор арқылы құттықтау тілектерін жеткізді. 

Шара барысында «Жыл спортшысы» атағы биылғы жылы самбо күресінен жастар арасында әлем чемпионы атанған Эльмира Самиғоллаеваға берілсе, кикбокстан Атырау облысының аға жаттықтырушысы Данияр Юсупов «Жылдың үздік жаттықтырушысы» аталымымен марапатталды. Осы ретте, «Үздік команда» болып - «Атырау барыстары» баскетбол командасы, «Жыл серпілісі» - Мүгедектер спорттық клубының суда жүзу бөлімінің спортшысы Ержан Сәлімгереев, «Үздік спорттық тілші» - «Ақ жайық» газетінің тілшісі Мұрат Сұлтанғалиев, «Үздік спорт ардагері» - Марат Көшенов және «Үздік аудандық дене шынықтыру және спорт бөлімі» аталымы Құрманғазы ауданының дене шынықтыру және спорт бөліміне берілді.

Мереке Асанова

Сурет Әнуар Әбілғазиевтікі