Атырау облысы әкімі аппараты басшысының орынбасары Марат Әбуовтің төрағалығымен мемлекеттік көрсетілетін қызмет заңнамалары туралы семинар өтті, деп хабарлайды AtyrauPress тілшісі.
Семинардың күн тәртібінде сыбайлас жемқорлық тәуекелдерін болдырмау, есепті кезеңде декларация тапсыру, мемлекеттік қызметшілердің құқығын қорғау, салық заңнамаларын сақтау сынды өзге де мәселелер қаралды.
Атырау қаласы бойынша Мемлекеттік кірістер басқармасы жалпыға бірдей декларациялау бөлімінің басшысы Аида Жантуринаның айтуынша, қазіргі уақытта активтер мен міндеттемелер туралы декларацияны (250.00 СЕН), кірістер мен мүлік туралы декларацияны (270.00 СЕН) қате тапсырғандар кездесіп, алдын алу үшін түсіндірме жұмыстары жүріп жатыр.
- Аталған декларацияны азаматтар жыл сайын тапсырады. Қазір тапсырғандар арасында қате толтырғандар кездесті. Мұндай қателіктерді болдырмау үшін азаматтарға түсіндірме жұмыстары жүргізілуде, - дейді А.Жантурина.
Биыл 13 мемлекеттік қызметші тәртіптік жазаға тартылған. Бұл туралы ҚР Мемлекеттік қызмет істері агенттігінің Атырау облысы бойынша департаментінің мемлекеттік қызмет саласындағы бақылау басқармасының бас маманы Гауһар Жарасова семинарда мәлім етті.
- Атырау облысындағы Әдеп жөніндегі кеңесте 13 лауазымды тұлғаның тәртіптік істері қаралып, кеңес шешімі негізінде тиісті тұлғалар тәртіптік жазаға тартылды. Егер мемлекеттік қызметші қызметтік әдеп нормаларын бұзғаны не тәртіптік терiс қылық жасағаны үшін алынбаған тәртiптiк жазасы болса, оны ауысу тәртiбiмен өзге қызметке орналасуына жол берiлмейдi, - дейді Г.Жарасова.
Жиын соңында қатысушылар көтерілген мәселелерді өзара талқылап, пікір алмасты.
Сонымен қатар Агенттіктің Атырау облысы бойынша департаментінің, сыбайлас жемқорлыққа қарсы күрес қызметінің, мемлекеттік кірістер департаментінің қатысуымен мемлекеттік қызмет және мемлекеттік көрсетілетін қызметтер салаларындағы заңнаманы түсіндіру, сыбайлас жемқорлыққа қарсы күрес және бойынша семинар өткізілді.