Атырау облыстық мәслихатының төрағасы Мұса Хайруллиевтің төрағалығымен және Атырау облысы әкімінің орынбасары Қайрат Нұртаевтың қатысуымен облыстық мәслихатының кезектен тыс X отырысы өтті, деп хабарлайды AtyrauPress тілшісі.
Жиында облыстық энергетика және коммуналдық шаруашылық басқармасының басшысы Айдулат Кенжебеков қалалар мен елді мекендерді күтіп ұстау туралы ережеге өзгеріс енгенін мәлім етті.
- Қазақстан Республикасы өнеркәсіп және құрылыс министрі бұйрығына сәйкес толықтыру мен өзгертулер енгізілуіне байланысты жаңа редакция әзірленді.Жобада жаңа терминологиялар енгізілген. Елді мекендерде инфрақұрылым объектілерін абаттандыруды және күтіп ұстауды ұйымдастыру жөніндегі іс-шараларға басымдықтар берілген.Шешім жобасы 4 тараудан тұрады. 1- тарауда терминологияны жаңа ұғымдармен толықтырған. Бұрынғы редакцияда 10 тармақтан тұрса, жаңа редакцияда 24 тармақтан тұрады. Ал қалалар мен елді мекендердің аумақтарын абаттандыру бойынша күтіп ұстау 14 параграфтан тұрады, - деді А.Кенжебеков.
Ал Атырау облыстық мәслихат аппаратының басшысы Ержан Барлыбайұлының айтуынша, мемлекеттік аудит объектілерінің тізіміне өзгерістер енді.
- Облыстық мәслихаттың әлеуметтік және мәдени даму мәселелері жөніндегі тұрақты комиссиясының бастамасымен Қазақстан Республикасындағы жергілікті мемлекеттік басқару және өзін-өзі басқару туралы заңының 6-бабына, мемлекеттік аудит және қаржылық бақылау туралы заңның 18- бабына сәйкес жергілікті бюджеттерден көктемгі су тасқынынан қорғану және оның зардаптарын жою жұмыстарын жүргізуге бөлінген қаржыға мемлекеттік аудит жүргізу үшін Атырау облысы бойынша тексеру комиссиясының мемлекеттік аудит объектілерінің 2024 жылға арналған тізбесіне енгізуді ұсынамыз. Осыны қолдауды сұраймыз, - деді Е.Барлыбайұлы.
Сессияда күн тәртібінен бөлек, жолаушылар қоғамдық көлікте тегін қатынау, облыс жолдарын жөндеу сынды мәселелер қаралды.
Мәслихат отырысын қорытындылаған облыс әкімінің орынбасары Қайрат Нұртаев жергілікті мердігерлерді жол құрылысына тартудың маңызына тоқталды.
- Бүгінгі отырыста қаралған маңызды мәселелердің бірі - елді мекендерді абаттандыру. Бұл жұмыстардың нәтижесінде барлық елді мекен абаттандырылмақ. Бұдан бөлек, сіздердің ұсынысыңызда айтылған облыс жолдарын жөндеу мәселесі - өзекті. Енді басталатын жол жөндеу жұмыстарына жергілікті мердігерлерді тарту керек. Олармен жұмыс істеген бізге де қолайлы. Құрылыс барысында да сұрау болады. Жиында құпталған барлық шешімді қолдаймын, - деді Қ.Нұртаев.