Бұл туралы Халықаралық Еуразиялық Телерадио Академиясының академигі, Мақат ауданының Құрметті азаматы, ҚазҰУ ғалымы Мәншүк МҰҚАШЕВА өзінің фейсбук парақшасында жазды, деп хабарлайды AtyrauPress тілшісі.
– Ресей Президентінің Қазақстанға сапары аясында көптеген келелі мәселелер талқыланады деп күтілуде, - дейді сарапшы. – Соның ішінде, мені оқытушы-ғалым ретінде жақын арада Астанада Ресейдің Сыртқы істер министрлігі жанындағы Мәскеу мемлекеттік халықаралық қатынастар институтының (МГИМО) филиалының ашылатыны жөніндегі жаңалық ерекше қуантып отыр.
Владимир Путиннің сөзіне сенсек, Ресейдің жоғары оқу орындарында шамамен 60 мың қазақстандық студент білім алып жатыр.
Жалпы, Ресей мен Қазақстан арасындағы стратегиялық серіктестіктің маңызы мен дамуы игі жалғасын таба беретіні Ресей Президентінің «Казахстанская правда» газетіне берген мақаласында да кеңінен айтылды ғой.
Айтпақшы, қазір Ресейдің оқу орындарында Қазақстаннан барған 60 мыңға жуық студент білім алып жүр. Астанада Мәскеу мемлекеттік халықаралық қатынастар институтының филиалын, ал Омбыда әл-Фараби атындағы Қазақ ұлттық университетінің өкілдігін ашу жоспарда бар.
Бұдан бөлек, Владимир Путин көрші елдер арасындағы достық, құрмет, және өзара көмек принциптеріне негізделген тығыз ынтымақтастыққа назар аударып отыр. Екі ел арасындағы экономикалық байланыстар, инвестициялар, сауда-саттық, сондай-ақ, технологиялық даму мен энергия саласындағы ынтымақтастықтың маңызы зор екені айтпаса да түсінікті жайт.
Сонымен қатар білім, мәдениет, спорт, және гуманитарлық саладағы ынтымақтастықтың дамуы да айрықша маңызды. Қазақстан-Ресей арасындағы әлеуметтік-экономикалық даму мен халықтардың өмір сапасын жақсарту үшін қосымша жобалар мен бағдарламалар іске асырылып жатыр.
Сол секілді, «Казахстанская правда» газетіндегі мақалада Ресей мен Қазақстанның халықаралық қауіпсіздік, тұрақтылық және дамуды қамтамасыз ету үшін көпжақты ұйымдарда бірге жұмыс істейтіні айтылып, алдағы уақытта халықаралық аренада да ортақ мақсаттар бойынша бірлескен әрекеттер жасалатыны тілге тиек етілген. Бұл да өз кезегінде екі елдің экономикалық және әлеуметтік әлеуетін арттыруға зор қадам болары сөзсіз.
Фото: Ақорда