Арақашықтық екі жұптың махаббатына кедергі болмады, деп хабарлайды AtyrauPress тілшісі.
Қоғамда әдеп пен адамгершілік өлшемдерінің терең тамырланып, қең жайылуында отбасы ұғымының маңызы орасан зор. Себебі отбасы – құрмет пен ынтымақтастықтың ошағы, кез келген зиялы қоғамның асыл діңгегі. Сол секілді, елімізде берекесі мен бірлігі жарасып, Ішкі істер саласында қызмет жолымен бірге еңсесін тіктеген жанұялар көп-ақ. Солардың бірегейі – қос полицейден құралған Хисметовтер отбасы.
Азат пен Қымбат қоғам үшін қауіпсіздік пен тұрақтылықты сақтау жолында қажырлы еңбек етіп, маңызды міндеттің жүгін қайыспай көтеріп келе жатқан тәртіп сақшылары. Мақсат-мүдделері бір жас жұбайлар құқық қорғау саласының қыр-сырын бірге меңгеріп, қызметтің мәніне терең бойлаумен, жинақтаған білім мен тәжірибесінің арқасында қазіргі таңда беделді қызметкерлер қатарында. Сол себепті әулеті көпке сыйлы, шаңырағынан құт үзілмеген екі жастың бүгінгі келбеті біраз жанға үлгі болмақ.
Ел тыныштығын қамтамасыз етуде қызмет жолын бір арнаға тоғыстырған екі жұп, алғаш рет бірін-бірі оқуда жүріп кезіктірген. Олар ҚР ІІМ Малкеджар Бөкенбаев атындағы Ақтөбе заң институтының қабырғасында бірге оқып, кейін өмірге деген көзқарастары мен қызметте жеткен жетістіктерінің арқасында екеуі өзара тіл табысып, 2022 жылы шаңырақ көтерген.
Несібесін адал еңбекпен тауып, қызметтерін абыроймен атқарып жүрген жас жұптың еңбек жолына үңілетін болсақ, полиция аға лейтенанты Қымбат Темірқызы Үйсенова Атырау қалалық полиция басқармасында Патрульдік полиция батальонының инспектор психологы болып қызмет атқарса, жолдасы полиция лейтенанты Азат Нұрболатұлы Хисметов ең алғашқы қызмет жолын Орал қаласы полиция басқармасының патрульдік полиция батальонынан бастаған. Осылайша қос тәртіп сақшысы біраз уақыт екі қалада бөлек қызмет атқарып, бір-бірінен жырақта жүрген. Алайда, арадағы бірнеше шақырымға қарамастан, жолдасы Азат сүйіктісін таң қалдырудан жалықпаған. Өзі Оралда жүрседе әр туған күн сайын Қымбатқа тосын сый жасаумен сыйлықтарын беріп, Атырау қаласына келіп құттықтайтын. Осылайша қашықтықпен сыналған қарым-қатынастар кейін көп ұзамай мәңгілік кіршіксіз махаббатпен марапатталып, қанша жерден бір-бірінен бірнеше шақырым алыста болсада, екі жүректің арақашықтығы кедергі емес, керісінше күшті махаббаттың болатындығын дәлелдей түсті. Қазіргі таңда мызғымас бірліктен құрылған екі жұп сана себер сәуледей өз жолдарын таңдап, бүгінде Атырау облысы Полиция департаментінде бірге абыройлы қызметтерін атқарып келеді. Отбасының құрылғанына небәрі 1 жыл болғанымен, Азаттың өзінің әдетке айналдырған дәстүрі бар. Ол жауапкершілігі мол қызмет барысына қарамастан, жан жары Қымбатқа ерекше көңіл бөліп, әр апта сайын шағын болса да сыйлық әкеліп отырады.
Ал осындай адамгершілік пен сүйіспеншілікке тәрбиелейтін өзара құрмет пен сыйластық қалыптасқан қос полицейге ата-анасының үлгі өнеге көрсетуі ерекше себепкер болып отыр. Өйткені Қымбаттың ата-анасы осы салада қажырлы қызмет етіп, зейнеткерліктің зеңбіріне абыроймен шыққан. Яғни, әкесі құқық қорғау саласының білікті маманы болып еңбек етіп, құрметпен зейнеткерлікке шықса, анасы Ұлболсын Оразбайқызы Оразғалиева Ұлттық Ұлан әскери бөлімінде қызмет атқарып, қазіргі таңда Ішкі істер органының әскери зейнеткері атанып отыр. Осылайша сүттей ұйыған отбасында жылулық пен мейірімге бөленіп өскен Қымбат ата-анасына еліктеп, олда нысанды киім киіп, халыққа қызмет көрсетуді арман еткен. Ал, егемен елдің еркіндігін сезініп есейген Азат бұл салаға келуге деген қызығушылығы бала кезден артып, елге қызмет қылуды мақсат тұтқан. Осылайша екі жұп ата-анасының қолдауымен бүгінде тек білікті маман ғана емес, адами тұрғыдан кемелденден биік белестерді бағындырып отырған жайы бар.
Шаңырағы биік, босағасы берік Азат пен Қымбат таң атса қызметке, кеш батса үйлеріне асығады. Қос полицей әрдайым отбасы құндылығын бірінші орынға қояды, сондай-ақ жауапкершілігі мол қызметте жоғары жетістікке жетуді көздейді. Болашаққа жоспары бір екі жұп қандай жағдай болмасын Отанға қызмет етуден асқан бақыт жоқ екенін үнемі айтып отырады. Осылайша құт қонақтап бақыт мекеніне айналған қос полицей ынтымақты өмірімен, әрі мәнді тірлігімен көпке үлгі болып отыр. Мұның сырын сұрағанымызда:
– Отбасы – адамды үлкен өмірге дайындайтын мектеп. Азат екеуміз танысқалы талай қызық пен шыжыққа куә болып келеміз. Оны жанашырым әрі қамқоршым ретінде ерекше бағалаймын. Қандай жағдай болмасын, болашаққа деген мақсатымыз айқын, мүддеміз бір. Өйткені, екеумізде бос уақытымызды пайдалы нәрсеге жұмсауға тырысамыз. Мен түрлі курсқа қатысып, құнды білім алуға талпынсам, жолдасым Азат қызметтен тыс уақытында спортпен айналысып, күреспен айналысады. Сол себепті егер әрбір отбасыда екі жұптың бір-біріне деген сенімі мен қолдауы қаншалықты мықты болса, қоғамның діңгегі де соншалық берік болары сөзсіз, - дейді полиция аға лейтенанты Қымбат Темірқызы.
Жарасымды жанұя мен ізгілікті қасиеттерге толы әулетке қанша мақтау айтсада жарасады. Адам баласының ажары да, бақыты да – отбасы. Ендеше елімізде көпке үлгі боларлық Хисметовтер секілді отбасылар көбейсе, салмақты да салиқалы ұрпақтың өсері анық.
Дереккөз: Атырау облыстық полиция департаменті