Атырау облысындағы Мақат ауданының оқушылары әр аптаның жұма күні мектепке ұлттық киім киюді дәстүрге айналдырып, насихаттауды қолға алған, деп хабарлайды AtyrauPress.
Жаңа оқу жылы басталғанда бірең-сараң оқушы ғана ұлттық киім кисе, екінші тоқсан басталғалы бері бұл бастаманы барлық оқушылар қуана қолдап отыр.
Балалар ұлттық киім киіп ғана қоймай, бұл күні ұлттық құндылықтарымызды дәріптеуге арналған түрлі іс-шаралар ұйымдастырады. Осы тақырыпта түрлі сауалнамалар жүргізіп, салт-дәстүрімізді насихаттауға бағытталған көріністер қояды. Б.Қанатбаев атындағы орта мектептің 10 сынып оқушысы Әмина Темірболатқызы ұлттық киімді үнемі кигенді қалайды.
«Ұлттық киіміміз өте әдемі. Әрі мәртебелі. Өзім алдағы уақытта тек бір күн емес, үнемі киіп жүргім келеді. Мектебімізде осындай бастама көтерілгеніне қуанамын», - дейді оқушы.
Айта кету керек, қазір Мақат аудандық білім бөліміне қарасты 9 мектеп бар. Оларда 6088 бала оқып жатыр.
Мира Нұртаева