Атырауда газеттен адамның ойына келмейтін бұйымдар жасайтын зейнеткер тұрады, деп хабарлайды AtyrauPress.
Халима Ахметқызы он жылдан бері қағаздан себет, қорап және бақа да пайдалы бұйымдар жасаумен айналысып келеді. Тіпті, қолөнер бағытында жастар арасында шеберлік сағаттарын да өткізеді екен. Өзі тұрып жатқан кішкене ғана үйі шағын шеберханаға айналдырыпты.
«Бұл өнер әкемнен мұра болып қалды. Ал, анамнан тоқымашылық өнері дарыды. Бір қуанатыным, жасап жатқан бұйымдарыма сұраныс жоғары. Газет қиындыларымен жұмыс жасау аса көп қиындық келтірмейді. Мұнымен теледидар қарап қойып та айналыса беремін. Әйтсе де, соның өзіне де жарты күн уақытым кетеді» дейді шебердің өзі.
Айтпақшы, кейіпкеріміз қырық жылын мемлекеттік қызмет саласына арнаған. Зейнетке шыққанына да он жылға жуықтапты. Енді ол жеке шеберханасын ашып, өзінің білгенін кейінгілерге үйреткісі келеді. Иә, атадан балаға мирас болып келе жатқан төл өнердің отын өшірмей, болашаққа аманаттау – парыз.
Амандық САҒЫНТАЙҰЛЫ