Атыраулық полицейлер отбасы тұрғындардың ыстық ықыласына бөленуде, деп хабарлайды AtyrauPress тілшісі.
Мейірім мен жанашырлық, татулық пен түсіністік орнаған шаңырақта ел дегенде елгезектік танытатын, рухы мықты ұрпақ өсіп-жетіледі. Ал шаттығы мен шырайы жарасқан, шаңырағынан бақыттың лебі ескен мұндай әулеттер арамызда жетерлік. Солардың қатарына қоғамның тыныштығы мен ел қауіпсіздігін түрлі заң бұзушылықтардан әрі қылмыскерлердің құрығынан сақтап, бір салада қалтқысыз қызмет атқарып келе жатқан Тасқалиевтер отбасын мақтанышпен айтуға болады.
«Басты мақсатымыз – отбасы деген құндылықтың қадір-қасиетін жоғалпай, елдегі бақытты шаңырақтардың санын арттыру» деген ұстаныммен өмір сүретін бір үйдің қос бірдей тәртіп сақшылары қазіргі таңда Исатай ауданында тұрады. Олар бір-бірін алғаш рет қызмет барысында жүріп, кезіктірген. Кейін өмірге деген көзқарастары арқасында екеуі өзара тіл табысып, 2021 жылдың 28 тамызында отау құрады.
Қарапайым өмірде ерлі зайыпты болып табылатын полиция капитаны Дулат пен полиция аға лейтенанты Динара жұмыс барысында әріптес жандар. Десе де, ерлі-зайыпты полицей погондар отбасы бақытына кедергі келтірмейтініне сенімді. Жұмыс еңбекті талап етеді, төзім мен кәсібилікті қажет етеді. Бірақ Дулат пен Динара да осы мамандықты таңдағанына ешқашан өкінген емес. Керісінше тәртіп сақшылары ел тыныштығы мен отбасы берекесін сақтауда қызметтерінің бір арнада тоғысқаны, олардың арасындағы түсіністікті арттырып, терезелерін өзгелермен теңестіріп, әріптестерінің алдында ілтипат-құрметіне бөленіп жүргендерін сөз етеді.
Қоғамның берік қамал-қорғанына айналған құнтақты жігіт Дулат Серікқалиұлы Тасқалиев құқық қорғау саласында 2014 жылдан бастап қызмет атқарып келеді. Жас болса да адал еңбектің жолында бар уақытын жұмысына сарп етіп өзіне берілген міндетті аса байыптылықпен орындайтын ол бүгінде Атырау облысының Исатай аудандық полиция бөлімінде учаскелік полиция инспекторы. Ал тағдыр қосқан жары Динара Болатбекқызы Төлегенова Ішкі істер саласына 2017 жылы келген. Жауапкершілігі мол қызметін абыроймен атқаратын полиция аға лейтенанты Динара Болатбекқызы Исатай аудандық бөлімінде кәмелетке толмағандардың істері жөніндегі учаскелік полиция инспекторы лауазымында қызмет атқарады.
- Қыз баланың осы өмірге келгендегі басты міндеті – отбасының берекесі атану маңдайына жазылған борыш десек те, көшке ілесіп тірлік ету заман талабы. Оған жоғары табандылық пен қайсарлықты, өжет мінезбен жауапкершілікті қажет етеді. Осындай жауапты да қиын қызметке келуіме менің табандылығым мен қайсар мінезім себепкер болды. Тәртіпке бағынғандардың, шынайы болғандардың жағындамын. Дегенмен, бірінші кезекте отбасым – басты байлығым, солардың қолдауының арқасында қызметті абыроймен атқарып келемін, ата-енем алдындағы келіндік міндетім де – кез келген шеннен жоғары, - дейді полиция аға лейтенанты Динара Болатбекқызы.
Сәні мен салтанаты жарасқан екі жастың бүгінде ай десе аузы, күн десе көзі бар үріп ауызға салғандай сүйкімді бір қызы бар. Қызметте де, отбасында да бір-біріне сүйеніш болып жүретін полиция капитаны Дулатпен Динара қызметтен тыс уақыттарын кішкентай қыздарына арнап, табиғат аясында отбасылық демалыс жасағанды ұнатады. Бұл тұрғыда өнегелі отбасы жыл сайын жазғы демалыстарын отбасымен бірге еліміздің үлкен қалаларына саяхаттауды әдетке айналдырған.
- Қоғамның діңгегі мен темірқазығы отбасы десек, еліміздегі әрбір шаңырақтың шайқалмауына, балалардың бүтін отбасында өсуіне әр адам мүдделі болуы қажет. Сол себепті балаларымыздың танымдылығы артып, болашаққа нақты жоспар қоюы үшін, жетістіктерге жетуі үшін мүмкіндігінше, жақсы оқып, көпті білгендерін қалаймыз. Осы бағытта екеумізде бірлесіп шешімін тауып, бірге жұмыс атқарып келеміз. Қоғамдық қауіпсіздікті сақтаумен қатар, еліміздегі әр баланың танымдық жетілуіне орасан үлес қосу біз үшін басты міндет, - дейтін полиция капитаны Дулат Серікқалиұлы әрбір жеке тұлғаның қолдағы барын бағалауға шақырады.
Зарина Забихова,
Атырау облысы полиция басқармасының баспасөз қызметінің ресми өкілі