Жаңа жыл қарсаңында Атырау облыстық төтенше жағдайлар департаментінің басшылығы оқушы тілегін орындады, деп хабарлайды AtyrauPress тілшісі.
27 желтоқсанда Жаңа жыл мерекесіне орай «Сармат» мамандандырылған мектеп-лицей-интернатының 8 «б» сынып оқушысы Нұрасыл Талғатовқа әсерлі көңіл күй сыйлау үшін, Атырау облысы Төтенше жағдайлар департаменті басшылығымен бір күн өткізілді. Бұл туралы Қоғаммен байланыс тобы мәлім етті. Оқушының басшы рөліндегі күні Департамент бастығының орынбасары подполковник Шариев Руслан Исмагиловичпен танысуынан басталды.
Әуелі Нұрасыл Департаменттің дағдарыс жағдайлары басқармасының тыныс тіршілігімен танысты. Кейін Күштер мен құралдарды жедел басқару орталығына келіп түскен шақыртулардың қалай қабылданатынын, радиотелефоншылардың жедел әрекетін көрді. Нұрасыл қызығушылық танытып, сұрақтарын қойып, құтқарушылардың қызметіне қызыға қарады. Департамент басшылығының қабылдауында болып, маңызды ақпараттарды алды.
Департамент бастығының орынбасары подполковник Р.Шариев Нұрасылды өрт сөндірушілердің тыныс тіршілігімен таныстыру мақсатында, №13 Мамандандырылған өрт сөндіру бөліміне алып барды. Өрт сөндіру бөліміне экскурсия жасап, өрт сөндіру техникаларымен, мұражаймен танысып, шартты түскен шақыртуға өрт сөндірушілердің жедел әрекет етуін, «Өзін-өзі құтқару» техникасын тамашалады.
Абыройлы қызметке қызығушылығын одан әрі арттырған – Жедел-құтқару жасағымен танысуы болды. Мұнда ол құтқарушылардың жол талғамайтын автокөліктерін, құтқару құрал-жабдықтарын, қайықтарды көрді. Жедел-құтқару жасағының құтқарушы иттері Гром мен Оллиді көрген Нұрасыл шынайы қуанышын жасырмады. Құтқарушы иттердің ерекше қабілеттерін көрген оқушы, оларға таңдана қарап мәз болды.
Осылайша Нұрасыл өрт сөндірушілер мен құтқарушылардың қиын да қызықты қызметінің бір күнімен танысып шықты.
- Мен бүгін Департамент бастығының орынбасары подполковник Р. Шариевпен бірге өткізген күніміз үшін алғысымды білдіремін. Мен бүгін өрт сөндірушілер мен құтқарушылармен таныстым, қызметтерінің жұмысы өте ауыр екенін түсіндім. Менің тілегімді орындап, ерекше көңіл күй сыйлағандарыңыз үшін ризамын, - деп алғысын білдірді Н.Талғатов.
Сондай-ақ, Сармат мамандандырылған мектеп-лицей-интернат оқушылары үшін нағыз мерекеге айналды. Себебі мектепке өрт сөндіру автокөліктері, жол талғамайтын «ТРЭКОЛ», «ШЕРП» автокөліктері, өрт сөндірушілер мен құтқарушылар келді. Бұл – Жаңа жыл қарсаңында Сармат мектебі оқушыларына сыйлық ретінде арнайы ұйымдастырылған акция болатын.
Акцияның мақсаты - оқушыларға Жаңа жыл қарсаңында ерекше көңіл күй сыйлау, қауіпсіздік талаптарын жеткізу. Департамент бастығының орынбасары подполковник Руслан Исмагилұлы Шариев аталған мектептің 8 сынып оқушысы Нұрасыл Талғатовпен өткізілген бір күнінің ерекшелігін айтып өтті. Сондай-ақ, оқушыларды қауіпсіздік ережелерінің талаптарын қатаң сақтауға шақырып, құтқарушы мамандығының қызметімен таныстырып өтті.
Кейін оқушылар өрт сөндіру және құтқару құрал жабдықтарымен танысты. Өрт сөндірушілер өрт техникасы туралы айтып, өрт сөндіру автокөліктерінің жұмыс жасау принциптерін және немен жабдықталғанын, көптеген өрт-техникалық қару-жарақтың не үшін қызмет ететінін көрсетті. Оқушылар өздерін өрт сөндіруші, құтқарушы ретінде сезінуге мүмкіндік алды. Құтқарушы иттердің қабілетін тамашалап, құтқарушы мамандығының маңыздылығын түсінді.
Оқушылар өрт сөндіру автокөліктеріне, жол талғамайтын «ТРЭКОЛ», «ШЕРП» автокөліктеріне таласа отырып, шынайы эмоцияларын жасырмады.
Іс-шара соңында оқушылар осындай ерекше акция ұйымдастырған Атырау облысы ТЖД басшылығына алғыстарын білдірді.
