Әлеуметтік желіде 72 жастағы марафоншы ақсақалдың көк Туды арқасына жауып билеген видеосы тарады. Бейнежазба Атырау қаласында өткен VI ANNUAL ATYRAU MARATHON шарасында түсірілген. AtyrauPress тілшісі видеодағы қарияның кім екенін анықтады.
Ол – өңірдегі ең жасы үлкен марафоншы Жаманбек Төлеутай екен.
Ал, бейнежазбаға келсек, оның астында неше түрлі пікір жазылуда. Бірі қарияның позитивті биін қолдаса, енді бірі сөгіп жатыр.
«Билей берсін несі бар, үлкен кісілер қалтырап үйде отыру керек пе?», «Тик-токта шашын жайып, тоңқайып билеген қыздардан осы атаның билегені мың есе артық», «Ақсақалды сыйлаймыз, бірақ жасқа да қарау керек қой, үлкендер жастарды бұзақы деп ренжиді, бірінші өздерінен бастау керек», «Осы жасқа келіп жүгіріп қараңдар, үйде отырып комментарий жаза бермей», «Жүгірген жақсы, бірақ ақсқақал әуретті жерін ашып билегені біртүрлі екен» деп жазуда желі қолданушылары.
Айта кетейік, жыл сайынғы спорт додасына бұл жолы мыңнан астам марафоншы мен 2 мыңнан аса тұрғын қатысып, 5, 10, 21, 42 шақырымға жүгірді. Нәтижесінде Еркебұлан Аташов, Әсем Абдуғазиева, Есенбол Жаңабек, Толқын Нұрышева, Ислам Аманқос, Ақбілек Құралай, Данияр Орманғали, Дарья Неделкина жеңіс тұғырынан көрінді.
Амандық САҒЫНТАЙҰЛЫ