Вокзалды жармақ болған адам ұсталды

ATPress. 25 мамыр. Бүгін Атырауда сағат 11:20 шамасында «102» жедел қызметіне белгісіз ер адам қоңырау шалып, теміржол вокзалы ғимаратына жарылғыш зат орнататынын хабарлаған.

Бұл туралы ATPress редакциясына Атырау облысы ішкі істер департаменті баспасөз қызметінің жетекшісі Гүлназира Мұхтарова хабарлады. Оның айтуынша, санаулы минуттардан соң вокзал аумағы түгелдей қоршауға алынып, ол жерден 150 жуық адам мен вокзалдың 50 қызметкері эвакуацияланған. Оқиға орнына ІІД мен ІІБ басшылығы және қаланың барлық жедел қызметі келіп жетті. Вокзал ғимараты мен оған тиесілі аумақ толықтай тексерілді. Бірақ жарылғыш зат табылмады. Хабарлама жалған болып шықты. 

«Сонымен қоса, жарылғыш құрылғы туралы хабарлаған, белгісіз адамды анықтау мақсатында жедел-тергеу амалдары жүргізілді. Оның тұрғылықты жері анықталып, құрықталды. Хабарлама таратқан – Құлсары қаласының 27 жасар тұрғыны болып шықты. Ұстау кезінде ол мас күйде болған. Жауап беру барысында ол «102» пультіне қоңырау шалғанын мойындады», - деп атап өтті Гүлназира Мұхтарова.

Қазіргі уақытта ұсталған азамат уақытша ұстау абақтысына қамалған. Сауыққаннан кейін тергеушілер жауап алуға кірісетін болады.  

ATPress

Сурет Рахим Қойлыбаевтыкі