Бас прокурор ресми үндеу жариялады

ATPress. 20 мамыр. Бүгін Бас прокуратура жанындағы заңдылықты қамтамасыз ету мәселелері жөніндегі Консультативтік кеңестің отырысы болып өтті.

Отырыс барысында ҚР Бас прокуроры Жақып Асанов жер мәселесіне байланысты ресми үндеу жариялады.

«Қазақстан Республикасы Президентінің 2016 жылғы 6 мамырдағы Жарлығымен Жер кодексінің кейбір нормаларын қолдануға мораторий жарияланды. Арнайы ашылған jerturaly.kz сайтында қазақстандықтар жер мәселесіне байланысты арнайы құрылған Комиссияға өз сұрақтарын қойып, ұсыныс-тілектерін бере алады. Бір сөзбен, жер мәселесі бойынша кез-келген пікір білдіру үшін барлық жағдай жасалған. Алайда, кейбір адамдар осындай жағдай мен заң талаптарын елемей, ортақ диалогтан қашып, халықты заңсыз қарсылық акцияларына шақыруда. Әлеуметтік, ұлтаралық араздықты қоздыру үшін жалған ақпарат әдейі таратылып жатыр», - деп атап өтті Бас прокурор.

Сонымен қатар ол, мұндай әрекеттер ҚР заңдарына қайшы келеді. Осыған байланысты қоғамдық тұрақтылықты сақтау үшін ел азаматтарын мұндай арандатуға бой бермеуге, азаматтық ұстаным мен жауапкершілік танытуға шақырды.

«Прокуратура туралы» Заңның 25-2 бабын басшылыққа алып, заңсыз митингке шақыру, оны ұйымдастыру, тіпті оған қатысудың өзі әкімшілік немесе қылмыстық жауапкершілікке әкеп соғатынын ескертемін. Құқық қорғау органдары кез-келген заң бұзушылықтың жолын кесіп, қылмыстық қудалауға дейін заңда көзделген шараларды дереу қабылдауға міндетті», - деді Бас прокурор Жақып Асанов.

Ақпарат пен сурет Бас прокуратура ресми сайтынан алынды