Атырау қаласында жол ережесін бұзған көлік жүргізушілері жауапқа тартылды, деп хабарлайды AtyrauPress тілшісі.
5 қаңтар күні Атырау қаласында патрульдік полиция батальонының қызметкерлері «Қорғау» ақпараттық жүйесі арқылы бірнеше жол ережесін бұзған жүргізушілерді анықтады.
Мәселен, Баймуханов көшесі айналма жолында маркасы Ваз-2104 автокөлік тоқтатылып, 24 жастағы жүргізуші көлігінің нөмірі жалған екені белгілі болды. Оған қатысты әкімшілік хаттама толтырылды.
Сонымен қатар, Атырау қаласы С.Бейбарыс-Махамбет көше қиылысында маркасы Toyota автокөлігі тоқтатылып, 40 жастағы азаматшаның жүргізуші куәлігінен айырылған күйде көлік жүргізгені анықталды. Жүргізушісіне хаттама толтырылып, іс мамандандырылған әкімшілік сотқа жолданды.
Аталған автокөліктер арнайы тұраққа қойылды.
"Құрметті Атырау қаласының тұрғындары мен қонақтары! Жол қозғалысы ережелерін қатаң сақтап, өз қауіпсіздігіңіз бен жол-көлік оқиғаларын алдын алу үшін жауапкершілік танытуды ескертеміз" дейді МАИ қызметкерлері.
Амандық САҒЫНТАЙҰЛЫ