Заңсыз саудаға тұсау қойылды

ATPress. 6 мамыр. Жергілікті билік өкілдері, қала көшелерінде орналасқан сауда дүңгіршектері мен павильондарын алып тастау туралы шешім қабылдады.

Осы орайда біз аталмыш шараның қалай жүзеге асып жатқандығы жөнінде білу үшін қалалық сәулет және қалақұрылысы бөлімінің бас маманы Оразғалиев Саянмен сұхбаттасқан едік.

- Сауда павильондары мен дүңгіршектерін алуға не себеп болып отыр?

- Қаладағы жеке сауда нүктелері мен дүңгіршектердің 99 пайызының тиісті құжаттары және ондағы сатушылар мен фастфуд дайындаушылардың санитарлық кітапшалары жоқ болып шықты. Сонымен қатар, ол жерлерде санитарлық және қауіпсіздік нормалары сақталмаған. Сатушылар мен тағам дайындаушылар жеке бас гигиенасын сақтауға арналған құралдармен қамтамасыз етілмеген. Тек жер иесімен жалға беру туралы жасақталған келісім-шарттары бар.

- Қазіргі уақытта қала бойынша қанша сауда павильоны бар? Олардың қаншасы алынып тасталды?

- Қала бойынша қазір 70-ке жуық сауда нүктесі бар. Барлығы дерлік заңсыз орналасқан. Бүгінгі күнге дейін 15 дүңгіршек алынып тасталды. Оның тек алтауы өз еркімен орындарын босатты.

- Аталмыш бағыт бойынша жұмыстар жоспар бойынша жүргізіліп келе ме?

- Иә, барлығы жоспарға сай. Бірақ, кейбір сауда қожайындары орындарын босатпай немесе алып тастаған дүңгіршекті сол жерге қайта орнатып қояды. Бізге онсыз да техника жетіспей жатқанда, осындай кәсіпкерлер жоспарлы шаралардың орындалысына кедергі келтіреді. 

- Бұл мәселеге байланысты дүңгіршек иелері мен ондағы жұмысшыларға шара қолданыла ма?

- Павильон иесін де, жұмысшыны да әкімшілік жауапкершілікке тарту, не басқа да шара қолдану біздің құзіреттілігімізге кірмейді. Біз тек хаттамалар толтырып, оларды шара қолдану үшін тиісті органдар мен инстанцияларға жолдаймыз. Уәкілетті орган шешім шығарғаннан кейін, кәсіпкерге белгілі мерзім ішінде орынды босату туралы хабарлама жібереміз, егер сол уақытта дүңгіршек орны босамаған болса, оны мәжбүрлі түрде алу шарасы қолданылады.

- Мәжбүрлі түрде алынған дүңгіршектер қайда сақталады және олар иелеріне қайтарыла ма?

- Олар «Арнаулы автобаза» аумағына апарып қойылады. Иесі қалаған уақытында оны өз күшімен алып кетуге құқылы.

- Аталмыш сауда орындарына рұхсат алу және оларды заң шеңберінде жүзеге асыру үшін не істеу керек?

- Қазір қаланың бас жоспарында, сауда жасауға арналған орындар қарастырылып, типтік жоба жасақталуда. Жобаға сәйкес, бір жерде бес немесе алты сауда павильоны жапсарлас салынады. Көше саудалары тек осындай, арнайы орындарда жүзеге асырылатын болады.Бұндай павильондарда сауда жасау үшін тиісті органдардан келісім шарт ретіндегі рұхсат алып, заңнамаға сай барлық құжаттар мен нормалар сақталуы керек.

- Типтік үлгідегі павильондар, алынып тасталатын дүңгіршектердің орнына салына ма?

- Негізінен қазіргі сауда нүктелері, көшелердің сыйқын кетіріп тұрғаны анық. Бас жоспар бойынша ол жерлерде балалар ойнайтын және тренажерлы алаңдар, көшеттер отырғызылатын шағын алаңқайлар орын тебуі мүмкін. Қысқасы дүңгіршектерден босаған орындар мақсатты және тұрғындар игілігіне пайдаланылатын болады.

Даурен Бекбол

Суреттер Атырау қалалық әкімдігінің баспасөз қызметімен ұсынылды